Ikibazo cya Miss Rwanda Akiwacu Colombe n’abagomba kumufasha mu mirimo ye gikomeje gufata indi ntera, mu bikorwa byose akora ntacyo bamufasha kandi imodoka yahawe ishaje nayo ikomeje kumubera ikibazo kuko yibera mu igaraje, arasabwa akayabo ngo abashe kuyihakura nabwo akitabaza amaduka ho hanze.
Akiwacu Colombe watorewe guhagararira abari b’u Rwanda nka Nyampinga w’igihugu, akomeje kwirya akimara mu gihe afite abagombaga kumufasha no kumushyigikira, ibyo bikiyongera ku kibazo cy’imodoka yahawe, iyi modoka yo ikaba yaratangiye kuvugisha benshi akiyihabwa kuko yahawe imodoka yakoze yo mu bwoko bwa Nissan, kugeza ubu Miss Colombe akaba ahamya ko iminsi myinshi ari iyo iyi modoka yagiye ijya mu igaraji, gusa ubu bwo noneho ibyayo byarazambye kuko ibyuma byo gukora iyi modoka byabuze mu Rwanda, mu gihe byaramuka bibonetse hanze y’u Rwanda kandi nabwo bikaba byatwara uyu mukobwa amafaranga atari macye.
Miss Akiwacu Colombe ararira ayo kwarika kubera imodoka yahawe nka Miss imutesha umutwe
Rwanda Inspiration Backup ni yo kompanyi yateguye igikorwa cyo gutora Nyampinga n’ibisonga bye ndetse no kumuhemba, mu masezerano yagiranye na Minisiteri ifite iki gikorwa mu nshingano ikaba yarahawe inshingano zo kwita no gukurikirana Akiwacu Colombe n’ibisonga bye bibiri byatowe. Nk’uko byemezwa na Ishimwe Dieudonne uzwi nka Prince Kid ari na we muyobozi wa Rwanda Inspiration Backup, imodoka yahawe Miss Colombe si yo modoka yari yaramuteguriwe, ahubwo we yemeza ko nyuma yo kubura abaterankunga bari biteze bahisemo kumugurira imodoka yo mu bundi bwoko kandi bakagura imodoka yakoze, ibintu byatangiye kuvugwaho byinshi iyi modoka igitangwa kuko benshi bemezaga ko ishaje mu buryo bugaragara.
Miss Akiwacu Colombe asabwa byibuze ibyuma by'imodoka biguze 553.009 hatarimo ay'umukanishi uzabishyiramo
Miss Colombe ahamya ko nta kumukurikirana byigeze bibaho, ndetse nk’uko byagaragaye na Ishimwe Dieudonne ubwe ntacyo yigeze akora ku kibazo cy’imodoka ya Miss yakomeje kurangwa no guhora mu igaraje. Papa wa Miss Colombe ni we wiruka mu bibazo byo gushaka ibyuma iyo modoka ikeneye, gusa kugeza ubu mu Rwanda byarabuze burundu, biba ngombwa ko batangira gushakira hanze ari nabyo bitegerejwe kugeza ubu mu gihe imodoka ikibereye mu bakanishi.
Imodoka ya Miss Colombe yibera mu igaraji, papa we ni we wiruka mu bibazo byo kuyishakira ibyuma ikeneye
Miss Colombe avuga ko yabashije kubara amafaranga bamubwiye ko ibyo byuma byagura, n’ubwo avuga ko ibikenewe ari byinshi kuko ishaje ariko iby’ingenzi bamuciye amafaranga y’u Rwanda 553.009 ngo bibashe kugurwa n’ubwo kugeza ubu bitaraboneka, ibyo byose kandi abashinzwe kumufasha no kumugira inama ntacyo baramufashaho ndetse nta n’icyo baramubwira kandi avuga ko ikibazo yakibagejejeho ndetse no muri Minisiteri iki kibazo kikaba cyarabagezeho inshuro nyinshi.
Miss Akiwacu Colombe ahamya ko n'ibikorwa akora byose abimenyesha abashinzwe kumufasha ariko ntibagire icyo bamufasha
Ku kibazo cy’imodoka, Prince Kid ahamya ko nta kintu na kimwe bazafasha Miss Rwanda Akiwacu Colombe kuko ari umutungo we bwite, iby’imodoka bakaba barabirangije bakiyitanga kuburyo ntacyo bamufasha mu by’umutungo bavuga ko ubu ari uwe bwite ari we urebwa n’ibyawo byose, kandi ko ibyo kuba imodoka yapfa ari ibintu bisanzwe cyane ko atahawe imodoka nshya.
Ishimwe Dieudonné uzwi nka Prince Kid ni we muyobozi wa Rwanda Inspiration Backup
Si icyo kibazo cy’imodoka kandi Miss Colombe afite ku bagomba kumufasha, dore ko no mu bikorwa bigera kuri bitandatu amaze gukora harimo ibyo gufasha abana b’imbyubyi n’abandi bababaye, ibi byose ntacyo yigeze afashwa n’abagomba kumufasha, gusa we avuga ko agomba gukora uko ashoboye kuko na we abyihoreye mu gihe kizaza yazitirirwa ko ntacyo yakoze mu gihe yari Nyampinga.
Manirakiza Théogène
Eng
RSS 
TANGA IGITECYEREZO