Umutekano mucye wahagaritse ibikorwa by'ubutabazi ku ndwara ya Ebola muri Kongo Kinshasa

Nyuma y’aho inyeshyamba zigabiye igitero ku kigo cyakorerwagamo ubutabazi bwihuse ku ndwara ya Ebola mu mujyi wa Beni mu ntara ya KIVU y’Amajyaruguru  ukomeje kuzahazwa n’icyorezo cya Ebola, abakozi 16 b'ishami ry'umuryango w'abibumbye ryita ku buzima OMS bari barimo, bahunze bahagarika ibikorwa byabo.

Ntibizwi igihe ibi bikorwa by'ubutabazi ku ndwara ya Ebola i Beni bishobora gusubukurirwa. Minisiteri y'ubuzima ya Kongo Kinshasa yatangaje ko iki gitero cyagabwe ku kigo cy'ubutabazi bwihuse ku ndwara ya Ebola cyagabwe n’abarwanyi b’umutwe urwanya leta ya Uganda urwanira mu mashyamba ya Congo, ADF NALU, wajujibije abatuye intara ya Kivu y’Amajyaruguru kuva mu myaka 30 ishize.

Hagati aho hashize amezi abiri abakozi bo mu bikorwa by'ubuzima bo muri aka karere bahagaritse gutanga inkingo n'ibindi bikorwa by'ubukangurambaga ku ndwara ya Ebola nyuma y'igitero cy'inyeshyamba cyahitanye abantu 18.

Iyi ndwara ya Ebola imaze guhitana abantu barenga 200 muri aka karere ka Kongo Kinshasa kuva yakongera kubura mu kwezi kwa 8 uyu mwaka wa 2018 ku nshuro ya cumi mu mateka y'iki gihugu.

Src: BBC