U Bushinwa bwatashye iteme rirerire kurusha ayandi ku isi rihuza imijyi ya Hong Kong na Zhuhai

Ubariyemo n'imihanda igana kuri iri teme, iri teme rifite uburebure bwa kilometero 55. Rihuza Hong Kong n'imijyi ya Macau na Zhuhai. Iri teme ryuzuye ritwaye agera hafi kuri miliyari 20 z'amadolari y'Amerika. Kuri uyu wa gatatu, ni bwo umubare muto wa za bisi zatangiye kugenda kuri iri teme.

Icyakora ryakabaye ryaratashywe mu mwaka wa 2016, gusa imirimo yo kuryubaka yagiye inyuzamo igacyerererwa. Ubwubatsi bwaryo bwagiye bukomwa mu nkokora n'ibibazo by'umutekano. Abategetsi bavuga ko abakozi 18 bapfiriye mu mirimo y'ubwubatsi bwaryo. Abandi bakozi babarirwa mu magana nabo bakomerecyeye mu bwubatsi bw'iri teme.

Ni iki kidasanzwe kuri iri teme?

Rihuza imijyi itatu y'ingenzi iri ku nkengero y'inyanja iri mu gice cy'amajyepfo y'u Bushinwa ari yo Hong Kong, Macau na Zhuhai. Iri teme ryubatse ku buryo nta mitingito y'isi n'imiyaga yarihungabanya. Ryubakishijwe toni ibihumbi 400 z'ibyuma, bivuze ko ibi byuma byifashishijwe mu kuryubaka byakubaka iminara 60 nka Tour Eiffel wo mu Bufaransa.

Perezida w'ubushinwa xi niwe watashye ku mugaragaro iri teme 

Ni iki abantu bari kurivugaho?

Abategetsi b'u Bushinwa bavuga ko biteze ko iri teme rizongera ubukungu, rikinjiza arenga 'tiriyari' imwe y'amadolari y'Amerika buri mwaka. Bimwe mu bitangazamakuru byo mu Bushinwa byaribatije izina ry'"iteme ry'urupfu". Zimwe mu mpirimbanyi zita ku bidukikije zivuga ko ubwubatsi bw'iri teme bwahungabanyije ubuzima bw'ibinyabuzima byo mu nyanja.

Src: BBC