Tugiye kubagezaho ubutumwa twahawe n'umusomyi wa Inyarwanda.com, watubwiye ko afite ikibazo gikomeye kugeza aho atakibasha gusinzira. Yavuze ko afite impungenge ko umugore aherutse gushaka ashobora kuba yaracuze kuko ari hafi kugeza imyaka 50.
Dore ubutumwa yatwandikiye: "Muraho!Ndi umugabo ukiri muto kuko nujuje imyaka 30. Mfite ikibazo kinkomereye ku buryo ntasinzira ni yo mpamvu nifuje ko abakunzi b'inyarwanda bangira inama kuko umutwe umwe wigira inama yo gusara. Siniriwe nivuga amazina ku bw'umutekano wanjye gusa email nkoresheje yo mwayitanga kuko itanyanditseho uwabikenera yanyandikira. Ubundi ndakijijwe ngerageza kwirinda icyaha n'igisa na cyo maze umwaka umwe urengaho gato ndongoye!
Njya kurongora bambujije umukobwa nari ngiye kuzana bambwira ko ari umukecuru ariko ndanangira nanga kumva nanjye sinzi ibyankoreshaga kuko sinamukundaga na gato ariko najya kumureka nkumva sinzi uko mbaye. Mu rukundo rwacu hari aho nageraga nkumva meze nk'umusazi n'ubu sindabibonera ubusobanuro cyane ko nta kintu kindi nari mukurikiranyeho muri bimwe by'imitungo byateye kuko yari akennye munsi yanjye.
Gusa nta gihe kirekire twateguye ubukwe ni yo mpamvu nta mwanya nabonye wo gutekereza neza ibyacu byaratunguranye. Imbere gato y'uko tubana n'uwo mukobwa namubajije imyaka ambwira ko afite imyaka mirongo itatu n'imisago ariko imyaka yambwiye si yo yari yanditse ku indangamuntu ye kuko tugendeye ku ndangamuntu afite imyaka irenze 45. Namubajije impamvu imyaka ambwira idahura n'iri ku ndangamuntu ambwira ko mu gihe cyo gufata indangamuntu yabarujwe na Nyirarume kandi ko atarazi igihe yavukiye.
Tumaze kubana ntibyakunze ko asama ku bw'impungenge twaje kujya kwa muganga bampimye basanga ndi muzima we sinzi ibyo bamumbwiye kuko nkorera kure yagiye gufata ibisubizo naragiye ku kazi bitewe n'uko ntuye kure y'urugo. Nyuma yaho gato yaje kumbwira ko imyaka iri ku ndangamuntu ari yo ye y'ukuri ariko abimbwira ku bwo kumwinginga cyane ngo ambwize ukuri kuko numvaga mfite impungenge. Kugeza ubu ntarasama ku buryo nkeka ko yaba yaramaze gucura.
Ku buryo icyizere cyo kubyara ntacyo ngifite bitewe nuko ari gusingira imyaka 50. Ndagisha inama rwose ngo mumbe hafi. Icya mbere numva ntajya kubyara hanze kuko sinifuza kubyara umwana ntazitaho 100%. Ikindi kandi nta rukundo ruhari wenda ngo rube ishingiro ryo kwihangana. Gusa igihe gishize nirinze kumubabaza naritwararitse cyane sindamubwira nabi na rimwe ku buryo urebeye inyuma watekereza ko urugo rwacu turi sawa ariko njye igikomere cyo mu mutima kirushaho kundyaryata. Nkeneye inama zanyu. Murakoze murakarama!
Tubibutse ko umuntu ushaka kugisha inama kuri inyarwanda.com, yohereza ubutumwa bukubiyemo ikibazo cye kuri Email yacu: nkoreiki@gmail.com kandi umwirondoro we ugirwa ibanga 100 %. Amafoto dukoresha kuri izi nkuru akurwa kuri internet.
Eng
RSS 
TANGA IGITECYEREZO