Hosiane ufite uburwayi bukomeye yatewe n'impanuka akeneye inkunga yawe kugira ngo ajye mu Buhinde kwivuza

Uwitonze Hosiane atuye mu Ntara y'Uburasirazuba mu karere ka Ngoma. Ni imfubyi ku babyeyi bombi. Benshi mu muryango bishwe muri Jenoside yakorewe Abatutsi mu 1994. Tariki 24/7/2013 nyuma y'igihe gito arangije amashuri yisumbuye ni bwo Hosiane yakoze impanuka imusigira uburwayi bukomeye dore ko yavunitse umugongo akaba atabasha kugenda. Hosiane yatangarije Inyarwanda.com ko yivurije mu bitaro binyuranye bya hano mu Rwanda, ntibyagira icyo bitanga.

Hosiane amaze imyaka 5 agendera mu kagare

Abo mu muryango we, badutangarije ko mu myaka itanu bamaze bamuvuza, bamaze gukoresha amafaranga y'u Rwanda asaga miliyoni eshanu. Ku bw'umugisha w'Imana Hosiane yaje kubona umuganga wo mu Buhinde wamubwiye ko hari icyo yakora akabasha kugenda. Kugira ngo ajye kwivuriza mu Buhinde, ay'ibanze akenewe ni ibihumbi 10 by'amadorali y'Amerika (8,700,000Frw) harimo itike y’urugendo, kwivuza no kubaho muri iyo minsi.

Umuryango we uvuga ko aya mafaranga batayabona bo ubwabo kuko ari menshi, akaba ari yo mpamvu basaba buri wese ufite umutima utabara kugira icyo abafasha. Bizeye ko Imana izakiza Hosiane ndetse ngo ni ibintu babwiwe n'Imana. Mukantagara nyina wabo wa Hosiane yagize ati: "Imana yatubwiye ko ifite inzira nyinshi izakoresha Hosiane agakira." Ni mu gihe abaganga bo mu Rwanda bo babwiye Hosiane ko yakwiyakira akagendera mu kagare.

Hosiane yivurije mu bitaro binyuranye birimo;Ibitaro bya Kibungo, CHUK, Ibitaro Byitiriwe Umwami Faisal ndetse n'Ibitaro bya Kanombe. Hosiane ngo yaje kumenyana n'umuganga wo mu Buhinde binyuze ku nshuti ye, nuko uwo muganga asaba Hosiane kumwereka ibizamini yagiye akoresha mu bitaro byo mu Rwanda, amaze kubibona amubwira ko hari icyo yakora akabasha kugenda. Kuri ubu hakenewe ubufasha kugira ngo Hosiane ajye mu Buhinde aho uwo muganga akorera.

Byinshi kuri Hosiane n'uko yahuye n'uburwayi yatewe n'impanuka

Amazina yanjye nitwa Uwitonze Hosiane, mvuka mu muryango w’abana 8: abahungu batanu (5) n’abakobwa batatu (3), akaba ari njye muhererezi iwacu. Nk’uko muzi amateka yaranze igihugu cyacu cy’u Rwanda naje kwisanga ari njye na Maman na mukuru wanjye dusigaye abandi bose bo mu muryango wanjye bapfuye muri Jenoside yakorewe Abatutsi mu w‘1994. Mama nawe yaje kwitaba Imana ubwo nari ngeze mu mwaka wa 5 w’amashuri yisumbuye.

Maze gusoza amashuri yisumbuye mu mwaka wa 2012 ninjiye mu buzima busanzwe ndetse nyuma mu mwaka wa 2013 naje kubona ikiraka ngikora igihe gito cyane nk'amezi 2 kuko nahise nkora impanuka. Hari ku itariki ya 24/7/2013 nazindutse njya mu kazi n'ubwo numvaga ntameze neza. Ngezeyo nsanga abakozi bose bari kujya mu muganda maze njyana nabo. Umuganda urangiye nashatse gusubira mu kazi ni ko gufata moto, tugeze mu nzira dukora impanuka kuko nari mpetse mudasobwa (Laptop) ndayigwira mvunika umugongo.

Nahise njya muri koma, ngarura ubwenge nyuma y’amasaha macye nisanga ndi kwa muganga navunitse umugongo ndetse hari n’ibice by’umubiri bitari gukora neza (igice cyo hasi cyose). Ubwo buzima nari nisanzemo kubwihanganira numvaga ntabibasha, numvaga nta byiringiro mfite, umubabaro ari mwinshi, nkabaza Imana impamvu yabyemeye. Gusa hari ibyo yemera ko bitugeraho atari uko itwanze.

N'ubwo byari bimeze gutyo numvaga nyuma y’amezi macye nzakira ngataha ariko siko byagenze. Nakomeje kuba kwa muganga igihe kinini nkabona nta mpinduka kuko ntacyo nabashaga kwikorera: Sinabashaga kwicara no kwihindukiza ubwanjye. Bwari ubuzima bugoye kuri njye n'abo twari kumwe. Nakiriye amakuru aturuka ku bantu benshi ko abagize ikibazo nk’icyanjye badakira, umubabaro ukaba mwinshi, ngasenga nsaba Imana kunkura ku isi  kuko numvaga kuzabaho ubuzima bwanjye bwose gutyo ntabishobora.

Nagerageje no kwivuza mu bitaro byose bishoboka hano mu Rwanda (CHUK, KING FAISAL, KANOMBE etc..) nkagenda mbwirwa n’abaganga amagambo akomeye. Ndibuka ko hashize amezi 6 nagiye kubonana n'umuganga (Docteur) kuri CHUK maze kumusobanurira byose ambwira ko nta kindi bankorera ahubwo ko nkwiriye kwakira kubaho muri ubwo buzima. Njye n'abo twari kumwe byatunaniye kwakira icyo gisubizo twuzura amarira gusa.

Nahise nsenga isengesho mbwira Imana nti: "Sinshoboye kwakira ubu buzima, sinzi n’uko nkwiye kubwitwaramo. None rero unyigishe uko ngomba kwitwara muri ubu buzima kuko ntazi icyo ngomba gukora.“ Koko Imana yumvise gusenga kwanjye kuko nubwo ntarakira hari byinshi yakoze kU buzima bwanjye kandi byari bikomeye. Yankijije ibikomere byo ku mutima nabanaga nabyo ndetse inampa umunezero ntari guhabwa n’uwo ari we wese. Uretse nibyo ngikora impanuka sinabashaga no kwihindukiza ariko ubu mbasha kwicara. Mpora nshima Imana kandi ku bw’umubyeyi (Tante) yampaye wandwaje kuva ku munsi wa mbere kugera uyu munsi.

Nyuma yïmyaka 5 nkoze impanuka ngize umugisha mbona inshuti zimbera abavandimwe, muri zo hari ababashije kuvugana n'abaganga mu Buhinde (India) baboherereza amafoto yo kwa muganga yerekana uko ikibazo mfite kimeze maze abaganga basanga hari icyo bankorera nkabasha kugenda nk’uko byari mbere. Basanze rero byatwara amafaranga ahwanye n'ibihumbi 10 by’amadorali (10.000 $) kugira ngo mbashe kuvuzwa (harimo itike y’urugendo, kwivuza no kubaho muri iyo minsi). Nshuti wowe umaze gusoma ubu buhamya bwanjye ugize icyo wamfasha, yaba ari ukunsengera cyangwa ukamfasha mu buryo bufatika n'uburyo bw’amafaranga, waba ugize neza, Imana yazakwitura iyo neza waba ungiriye.

Muri urwo rugendo rugoye rw’ubuzima hari ijambo ry’Imana rihora rinyongerera imbaraga, ni ijambo dusanga mu rwandiko rwa mbere Pawulo yandikiye Abakorinto 10:13 hagira hati: "Nta kigeragezo kibasha kubageraho kitari rusange mu bantu, kandi Imana ni iyo kwizerwa kuko itazabakundira kugeragezwa ibiruta ibyo mushobora, ahubwo hamwe n'ikibagerageza izabacira akanzu, kugira ngo mubone uko mubasha kucyihanganira.“

Nubwo nahoraga nibaza impamvu y’ibyambayeho naje kumenya ko Imana imfiteho umugambi mwiza. Ku bwa byinshi yakoze mu buzima bwanjye ndetse n’aho igejeje ikora ndayishimiye kandi ndacyayifitiye icyizere kuko nzi ko ishobora byose. Imana ibahe umugisha."

Mukantagara nyina wabo wa Hosiane avuga ko uyu mwana w'umukobwa yamubereye umurwayi udasanzwe akurikije ububabare yari afite. Ati: "Yampaye isomo kubera kwihangana kwe". Hosiane avuga ko mu burwayi amaranye imyaka 5 yize byinshi; ngo yabonye gukora kw'Imana, ati:"Nize byinshi, nabonye gukora kw'Imana, Imana irakora mu bihe byose"

Ubaye wumva hari icyo Imana igushoboje kuba wafasha Hosiane dore uko wabikora 

Uramutse hari icyo Imana igushoboje kuba wafasha Hosiane dore aho wanyura

-Mobile Money:0789479046 (Uwitonze Hosiane)

-Acount number:01390201238-84 (Cogebank)

-Account Name: Uwitonze Hosiane

Abo mu muryango wa Hosiane bafite icyizere cyinshi ko azakira akegenda nk'uko byahoze

Hosiane ni umukobwa uhorana akanyamuneza

Hosiane akeneye ubufasha bwawe kugira ngo avurwe akire abashe kugenda nka mbere

Ubaye wumva hari icyo Imana igushoboje kuba wafasha Hosiane dore uko wabikora;

Uramutse hari icyo Imana igushoboje kuba wafasha Hosiane dore aho wanyura

-Mobile Money:0789479046 (Uwitonze Hosiane)

-Acount number:01390201238-84 (Cogebank)

-Account Name: Uwitonze Hosiane