Kuva taliki ya 1 z’uku kwezi kwa 8 muri 2018, icyorezo cya ebola cyagera mu ntara ya Kivu y’Amajyaruguru abicwa n’iki cyorezo bamaze kwiyongera. Muri 49 bamaze gupfa ,39 ni abo mu mujyi wa Beni. Ni mu gihe hari impungenge ko uyu mubare ushobora kwiyongera.
Icyorezo cya Ebola cyongeye kubura mu Burasirazuba bwa Repubulika Iharanira Demokarasi ya Congo kuva mu ntangiriro z’uku kwezi kwa Kanama nk’uko Leta y’iki gihugu ibivuga. Icyakora ishami ry’Umuryango w’Abibumbye ryita ku buzima OMS ryo rivuga ko iyi mibare ishobora kwiyongera, cyane ko abandi bantu basaga 2157 bahuye n’abarwayi ba Ebola, ibibashyira mu kaga ko guhitanwa n’iki cyorezo.
Imibare itangwa na OMS igaragaza ko kuri ubu usibye abantu 49 bamaze guhitanwa na Ebola, abandi 63 byemejwe ko bayanduye naho abandi 27 bakaba bakekwaho kuba barayanduye. Abenshi muri aba banduye n’abapfuye ni abo mu ntara ya Beni n’intara ya Ituri.
Trik Jasarevic umuvugizi w’ishami ry’Umuryango w’Abibumbye ryita ku buzima OMS yatangarije itangazamakuru ko imibare y’abahitanywe na Ebola ndetse n’abayandura ishobora kwiyongera.Yagize ati”Twiteze ko imibare y’abandura Ebola iziyongera kuko ntituzi neza niba abantu bose bahuye n’abarwayi ba Ebola twarashoboye kubamenya kugirango tubarinde kwanduza abandi”
Icyorezo cya Ebola cyongeye kugaragara muri Congo Kinshasa ku nshuro ya 10 kuva mu mwaka 1976 kimenyekanye. N'ubwo Ebola kuri ubu itarabonerwa umuti ariko urukingo rwo rwatangiye kugeragezwa muri iki gihugu. Icyorezo cya Ebola cyahitanye abantu 11300 mu Burengerazuba bw’Afurika mu bihugu bya Liberia, Sierra Leone na Guinea mu myaka iri hagati ya 2013 na 2015.
The East African
Eng
RSS 
TANGA IGITECYEREZO