1995 nibwo Kundwa Doriane, nyampinga w’u Rwanda 2015 yavutse: Bimwe mu byaranze uyu munsi mu mateka

Ibintu by’ingenzi byaranze uyu munsi mu mateka y’isi:

753 BC: Umujyi wa Roma mu gihugu cy’ubutaliyani warashinzwe, ushingwa na Romulus. BC: mbere y’ivuka rya Kirisitu.

1506: Mu bwicanyi bwiswe uba Lisbone, mu gihe cy’iminsi 3 gusa abayahudi basaga 1900 n’abandi bakekwagaho kuba abayahudi bishwe n’abagatolika b’abanya-Poltugal.

1782: Umujyi witwaga Rattanakosin, kuri ubu uzwi nka Bangkok muri Thailand warashinzwe, ushingwa n’umwami  Buddha Yodfa Chulaloke.

1960: Brasília, umurwa mukuru wa Brazil waratashywe ku mugaragaro ku isaha ya saa tatu n’igice za mu gitondo, usimbura uwari umurwa mukuru Rio de Janeiro.

1966: Umwami wa Ethiopia, Haile Selassie ufatwa n’abayoboke b’imyemerere ya Rastafari yasuye igihugu cya Jamaica mu rwego rw’ubukangurambaga bw’iyi myemerere.

1992: Abahanga mu by’ubumenyi bw’ikirere Alexander Wolszczan na Dale Frail, bavumbuye indi mibumbe 2 itari izwi mu isanzure ry’izuba.

Abantu bavutse uyu munsi:

1926: Elizabeth II umwamikazi w’ubwongereza yabonye izuba.

1954: James Morrison, umukinnyi wa filime w’umunyamerika nibwo yavutse.

1959: Arno Pijpers, umutoza w’umupira w’amaguru w’umuholandi nibwo yavutse.

1988: Jencarlos Canela, umuririmbyi akaba n’umukinnyi wa filime w’umunyamerika ukomoka mu gihugu cya Cuba wamenyekanye nka Diablo muri filime El Diablo yabonye izuba.

1995: Kundwa Doriane, nyampinga w’u Rwanda wa 2015 yabonye izuba.

Abantu bitabye Imana uyu munsi:

1509: Umwami Henry VII w’ubwogereza yaratanze.

1994: Abatutsi biciwe hirya no hino mu gihugu mu gihe Jenoside yakorewe abatutsi mu Rwanda yari ikomeje.

2006: Telê Santana, umutoza w’umupira w’amaguru w’umunyabrazil yaratabarutse, ku myaka 75 y’amavuko.