Kuri Shiloh Prayer Mountain church hagiye kubera umugoroba wo kuramya Imana hanatahwe indirimbo ya Nounou

Uyu mugoroba wo kuramya no guhimbaza uzaba kuwa Gatanu tariki ya 22/9/2017 guhera saa kumi n'imwe z'umugoroba kugeza saa mbiri z'ijoro (17h kugeza 20h) ukazabera ku Gitega aho itorero rikorera. Ibyinshi bitamenyerewe nuko hazatahwa kumugaragaro indirimbo yakozwe n’umwe mu bagize itsinda Worship Team rya Shiloh ari we Munezero Manzi Clemence (Nounou) mu ndirimbo ye  'Mba ndi he?'

Tuganira na Numa Alain, umuyobozi ufite amakorali n’umuziki mu nshingano ze muri mu itorero Shiloh Prayer Mountain, yadutangarije ko impamvu yo gutaha indirimbo imwe ya mbere Nounou aruko biri mu mugambi w’Itorero mu gushyigikira impano zigaragaye mw’itorero nkuko byigeze gutangazwa n’umushumba Bishop Olive Murekatete, aho uyu mushumba (Bishop Olive) yagize ati: "Birakwiye ko Itorero rijya rishyigikira impano zigaragaye, rikaba hafi yabo banyempano kugira ngo zikomeze ndetse zinakurire mw’itorero."

Nounou azaririmbira abantu indirimbo ye nshya

Muri uyu mugoroba rero hatumiwemo abandi baramyi nka Rodrigue, Prosper, Chelsea, Ruth na Favor aho bazifatanya na Shiloh Worship team ndetse na Nounou uzataha indirimbo ye. Biteganyijwe ko kuramya no guhimbaza bizafata umwanya munini w'uwo mugoroba ariko abazitabira uyu mugoroba bakazabana na Ev.Rugaba Henri mu mwanya w’ijambo ry’Imana. Inyarwanda yaganiriye na Nounou imubaza gahunda afite imbere niba azakora amashusho y'iyi ndirimbo ye cyangwa se niba ateganye kuzakora album yose. Mu magambo ye ati: "Yego nzakora video yayo ndetse ndateganya gukorana album yose."

Igitaramo cyateguwe na Worship team yo kuri Shiloh prayer Mountain 

UMVA HANO 'MBA NDI HE' YA NOUNOU