Urubyiruko rugize TLC, ZDs, Praise again na Awake rwasuye urwibutso rwa Ntarama runaremera incike ya Jenoside

TLC (True Light of Christ) ni itsinda rikora umurimo w’Imana babinyujije mu mpano Imana yabahaye yo kubyina (drama), rikaba ribarizwa mu itorero Miracle Center ry’i Remera riyoborwa na Bishop Samedi Theobald. TLC ni yo yateguye iki gikorwa cyo gusura urwibutso rwa Ntarama ku bufatanye bw’andi matsinda y’urubyiruko arimo: Awake, Praise Again na ZDS.

Kuri uyu wa gatandatu tariki ya 8 Mata 2017 basuye urwibutso rwa Ntarama mu karere ka Bugesera aho intego yabo yari iyo kurushaho kumenya no gusobanukirwa amateka yaranze Jenoside yakorewe abatutsi mu rwego rwo kurushaho guhangana n’abagifite ingengabitekerezo ya Jenoside ndetse n’abayipfobya nkuko Inyarwanda.com yabitangarijwe na Kabandana Thierry uzwi nka Kazungu, uyu akaba abarizwa muri Awake ikina amakinamico ndetse igatanga n'ubutumwa binyuze mu mivugo.

Nyuma yo gusura urwibutso rwa Ntarama, uru rubyiruko rugera kuri 45 rwitabirikie iki gikorwa, rwasuye umubyeyi warokotse Jenoside yakorewe abatutsi baramuhumuriza bamwereka ko atari wenyine muri ibi bihe abanyarwanda bibuka ku nshuro ya 23 abatutsi bazize Jenoside muri Mata 1994. Uyu mubyeyi basuye yitwa Mukarugamba Ancilla akaba yaraburiye abana be bose muri Jenoside yakorewe abatutsi. Umukozi wa Komisiyo y’Igihugu ishinzwe kurwanya Jenoside (CNLG) wabanye n’urwo rubyiruko yarusobanuriye byinshi byaranze Jenoside yakorewe abatutsi by’umwihariko mu karere ka Bugesera.

Amafato y'iki gikorwa

Basobanuriwe amateka ya Jenoside yakorewe abatutsi

Basuye umubyeyi witwa Ancilla waburiye abana be muri Jenoside, baramuhumuriza

Nyuma y'igikorwa bakoze, bafashe ifoto y'urwibutso

AMAFOTO: Byishimo Espoir