Umukobwa uhamya ko yabaga ikuzimu yiyemereye ko ari we wahimbye inkuru ivuga ko Gitwaza ajya ikuzimu-UBUHAMYA

Umukobwa w'umunyarwandakazi witwa Mutoni w'imaka 16 y'amavuko wiyemerera ko yabaga ikuzimu agakorera satani igihe kitari gito, yatanze ubuhamya mu rusengero rwa Zion Temple mu Gatenga, avuga ko ari we wahimbye amakuru avuga ko Apotre Dr Paul Gitwaza ajya ikuzimu. Intego ngo yari yarahawe na satani yari ugusenya Zion Temple. Ngo satani yashakaga no gusenya urusengero rwa Robert Kayanja rwo muri Uganda. Gitwaza na Kayanja ngo ni bo bapasiteri bonyine bananiye Satani bituma abagabaho ibitero byari biyobowe n'uyu mukobwa w'umunyarwandakazi witwa Mutoni.

Mutoni (Queen) wiyemerera ko yabaga ikuzimu

Si ibyo gusa ahubwo uyu mukobwa avuga ko yazanaga urumogi rwinshi mu Rwanda. Mu byo yatangaje bitangaje harimo no kuba ikuzimu ngo yari afiteyo umusore bakundana witwa Kalisa. Yabwiye abasore bo mu rusengero rwa Zion Temple ko yamaze guhindurirwa amateka bityo ngo ntibazatinye kumutereta. Yavuze ko ikuzimu ari habi, ati: "Ikuzimu ni habi ntihazagire uhifuza, mukorere ijuru,.."

Uyu mukobwa Mutoni Queen watangaje ko yari asanzwe asengera muri Zion Temple ariko akahasengera ku mpamvu z'akazi ka satani, yitanzeho urugero avuga ko abantu bose bajya mu rusengero atari ko baba bagiye gusenga kuko ngo haba harimo n'aboherejwe na satani. Na we ngo yajyaga muri Zion Temple mu Gatenga, akabyina ntube wamenya uwo ari we. Mu buhamya burebure yatanze nyuma y'umunsi umwe wonyine asengewe na Apotre Gitwaza akamwirukanamo imyuka mibi, uyu mukobwa witwaga Queen ikuzimu yagize ati:

"Yesu ashimwe bakozi b'Imana, ngiye kubabwira ariko ntimuntinye kuko ndi mushyashya. Nta bwoba mfite, mfite umunezero mwinshi. Ubundi sinari umuntu, nari umukozi wa satani umwe wemewe n'amategeko. Naje ahangaha (Zion Temple/Gatenga) sinari nje gusenga, nari mfite intego eshatu; Aba Protocols, abakobwa basenga ku wa mbere n'aba mama. Ariko kuri njyewe nari mfite imitima ibiri mvuga nti baranyica cyangwa se ndarokoka kuko pasiteri (Gitwaza) yahagararaga ahangaha, wagira ngo buri gihe yazaga avuga kuri njyewe, ejo yaravuze ati reka nze ndabereka aho umurozi ari.

Nari nicaye hariya ntangira gukubitwa inshyi, bambwira bati ninsohoke (aravuga abadayimoni), ariko mu gusohoka kwari ukugenda guhagarara mu modoka hariya mu muhanda ikanyanura kuko babonaga ubwonko bwanjye bwamaze gufunzwa n'amasengesho y'ahangaha. Ndashima Imana ku byo inkoreye byose, kandi n'ikindi nkaba nsaba Imana imbabarire na pastor (aravuga Gitwaza) ambabarire. Mumbaze ngo ni iyihe mpamvu musabye imbabazi?

Mwigeze kumvaho inkuru ngo pasiteri (Aravuga Gitwaza) ajya ikuzimu? Ni wo mwambaro mubi bari baramushyizeho. Ni abahungu babiri bawanditse, igitekerezo ni njyewe wakizanye. Ni abapasiteri babiri bari bakinaniranye, Pastor Kayanja na Pastor Apostle (Gitwaza). Haleluya. Njyewe rwose ntabwo nari nzi ibyambayeho, naherutse nkubitwa inshyi bambwira ngo ninsohoke, nongeye gushiduka ndi ahangaha, sinzacika intege gukorera Uwiteka.

Icyatumye ninjira mu gukorera satani ni ababyeyi banjye batanyitayeho. Ntabwo nabonye urukundo rwa mama cyangwa urwa Data. Natangiye kubona ihohoterwa nkiri mutoya mfite imyaka 9 kugeza ku myaka yanjye 14. Mbaza Imana nti ese mu gihe Data anyanze na Mama akanyanga, na we Imana unyange? Na Satani ntabwo ujya wakira abawe. Ni uko natangiye gukorera satani mu buryo butari buzwi. Nkakorerwa ihohoterwa nkananirwa, nkakora akazi ko mu rugo kakananiza, nijoro nkaba mfite ahandi nigira muri Paradizo yo hepfo (aravuga ikuzimu). Yesu ashimwe! Ikuzimu mwaba muzi uko hasa? Muzi gukorera satani uri mutoya ukuntu bibabaza? Muzi igikomere mfite mu mutima? Ndakeka buri umwe wese azanyanga kubera ubuhamya bwanjye. 

Bageze ahongaho bakajya (abadayimoni) bantuma abakobwa bo kwa Kayanja. Natwayeyo abakobwa babiri, mbashukishije amafaranga. Ni ahangaha (Zion Temple/Gatenga) ni ko byari bimeze, aba ushers (aba protocols/abadiyakoni) bamwe bari bagiye kugenda. Ariko mumbaze umunsi wa mbere byangendekeye gute? Naraje, yego nemeraga ko nakizwa ariko numva ntareka n'umuryango wundi nabonye hepfo (ikuzimu) kuko ni wo wanyitayeho. Byageze aho ngaho bigera ku ntera yo hejuru, ndatoroka mu Rwanda njya Uganda, nta cyangombwa na kimwe, just nari mfite ubwiza ngira ngo abandi batabona. Satani yari yaranyambitse iyindi shusho. Ndabizi ahangaha ni ku mbeho. Si byo? Benshi barandeba.

Nageze Uganda, sinamenye uburyo nakiriwe, nakiriwe n'abahinde, gusa abahinde bo noneho banyinjije mu mwuga neza. Icyo nari ndiho kwari ukwangiza abana b'abakobwa b'abanyarwanda, ubwana (aravuga abana) butoya bw'imyaka itatu, ni ko nari meze nkumva ni byo byishimo byanjye. Icyo gihe icyo nari ndiho mvuga nti icyo nkorera ni uko mama apfa, Data agapfa na mukadata agapfa kuko ni bo bantu mu buzima nanga. Yesu ashimwe! None ubungubu ndi kwicuza n'impamvu navuze nti satani kuki atakira abayo. Yesu ashimwe! Uzi kugera aho umanura musaza wawe kwa nyoko? Najyanye musaza wanjye ngo ni uko mama yamubyaye ku mugabo ntakunda. Just iyo ngiyo iba impamvu.

Nababwiye nti ntimuntinye ahubwo ndasaba nka mwe church mumbe hafi. Ndabizi ahangaha tuba twaje gusenga, njyewe sintinya kubabwira. Tuba twaje mu buryo butandukanye. Ubu se njyewe uwambonaga ahangaha muririmba nkasimbuka yankekeraga ibyo ngibyo? Haleluya! Buri umwe ajye yibwira ko ku ruhande rwe, satani aticaye kandi gusenga ntabwo ari ukuvuga ngo 'Mana', ujye usengera n'umuryango wawe. Kandi na none ababyeyi muri ahangaha, uzi yuko afite umwana hanze, basha kumwegera, umwana atazaza ati ariko se mère we ubundi wibonamo iki? Aho ngaho ujye uhita utokesha umubwire uti Mwana wanjye uri umwana w'Imana ntabwo uri uwa satani. Umwana gukomeza kumwegera ni bwo yumva ko afite ababyeyi. (....)

Nk'uko nangije benshi, nzagarura benshi. Imyaka yanjye yose 16 maze ku isi, abantu muri ahangaha mwikube inshuro enye, ni wo mubare nibura wenda naba maze kwangiza. Yesu ashimwe! Ese ndi nde ku buryo Uwiteka yandokora? Ndi nde njyewe wacumuye, wangije byinshi? Ndumva umutima wanjye usa nk'aho uruhutse. Mu gusebya satani, mba numva muri njyewe hari ibiro niyongera. Nijoro aho Pastor (Gitwaza) yansengeraga, bagiye bambwira (abadayimoni) uremeye umuryango wacu uwangije utyo? Nendaga gushyirwa ku ntebe y'ubwamikazi (ikuzimu). Ntukabone umuntu agenda ngo umubaremo nk'umuntu! Bagiye bavuga ariko Queen uremeye umuryango wacu uwusenye utyo? Ese wasohotse ukaza tukajyana?

Byabanjirije mu mupasiteri. Umupasiteri akaba ari we umbwira, umwe basengeye ahangaha. Ariko uko bakomeje gusenga birimuka bijya mu wundi mu mama, bigeze aho ngaho bibura ibyicaro (abadayimoni), byirukanka ahangaha byirukanka cyane, baravuga ngo nta ribi ariko ntuzatuza. Ariko mu izina rya Yesu nzatuza kandi nzatunganirwa. Ariko satani ko yishutse? Ukeka y'uko ahangaha waba waje kuneka, waba waje gutwara benshi ariko waba wageze aha ni wo mwanya wawe wo gukira. Nanjye mfite uwo mugambi, ngera ahongaho ngera mu bakobwa, nari mfite intego y'abakobwa bane, ngira ngo bamwe bariyizi kuko nabibabwiyeho. Ariko muri abongabo, Imana iri kunyereka ko ari bo mfitemo urukiriro, ni bo bazanyereka inzira nziza. Ubu ni bo bashiki banjye muri uru rusengero. Murumva ukuntu abantu twiyangiriza future (ejo hacu)? 

Mu myaka yanjye 16 ntangiriye gukorera kariya kagabo ko hepfo, kuki ntakorera uwo hejuru? Ngiye mu mateka yanjye mwakwandika n'ibitabo, mwafata filime. Abenshi abanzi munzi nk'ikirara ariko si cya kirara gisanzwe kuko ntiwambaza uti nanyuzaga hehe urumogi nazanaga mu Rwanda? Ukumva umwana wawe araje ngo mama mvuye kugacoma, ukibaza avuye gucoma agaki ariko ukabiyoberwa.(....)"

Mvuze byinshi nagera kure nta nubwo twaha umwanya pastor (Gitwaza). Gusa ikintu mfite ku mutima, ni icyo nenda gusaba runo rusengero (Zion Temple). Nkeneye umuryango mushya, nkeneye inshuti nshya, nkeneye uzangarura mu gihe nongeye kuyoba. Reka mbahe noneho amakuru asekeje, nari ndi muri douche, wumve ka kagabo ukuntu gasuzugura, ni n'akagabo, ni n'agacucu, nta bwenge kagira, waba wasengewe wasizwe amavuta, kabona yuko katsinzwe kakakugarukira mu buzima?  Ehhh ariko ubucucu bwako ko ari bucyeya ra! Nta bwenge afite muri we. 

Nari ndi gukaraba, arangije ati Queen, ndaceceka ngira ngo ni abo hanze, ati Queen ndi kuvugana nawe. Ndangije nti ngo ngwiki Kalisa we! Yitwa Kalisa, ni we wari 'Fiancé' wanjye. Ni ikuzimu ariko ntabwo ari inaha (ku isi), mutazatinya kuntereta muti 'mfite umuzimu' (abakristo bahise baseka cyanee). Arangije (aravuga Kalisa) ati Uremeye wishe byose...Yego twatwikagwa n'uko basenga, ariko nawe uremeye ujyanye na bo? Ndavuga nti ariko se wowe, icya mbere nta mbaraga mufite, muri kiyobya. Ati Oya ntabwo uzi ukuntu nagukundaga se? Nti ariko uzi 'Fiancé' mushya mfite? Ni Uwiteka. Arangije (umudayimoni) araseka cyane ati ariko Queen ukeka ko wandeka gutyo? Uzabonabona, uzarara hanze, kandi ndakeka ibimenyetso bimwe watangiye kubibona. Yesu Ashimwe! By the way, ikuzimu ni habi, ntihazagire uhifuza, mukorere ijuru kuko ni ryo ryatugenewe. (...)

Icyo Apotre Dr Gitwaza yavuze ku buhamya bwa Mutoni (Queen)

Nyuma y'ubuhamya bwa Mutoni, Apotre Gitwaza yafashe ijambo asaba abantu bose kudakinisha ubuhamya bw'uyu mukobwa. Yagize ati: "Ibi bintu ntimubikinishe. Ni ibintu bikomeye cyane. Ibyo nababwiye ko turi bwiyambure imyambaro y'ama rumors yose (ibihuha), kuko abarozi ni bo basebya abantu, inkuru ikaba impamo, bakabikora. Baraza bagaca mu bantu, ariko ari imigambi yacuriwe ikuzimu. Uyu mwana (Mutoni) ntabwo muzi, namubonye ngira ngo ejobundi aje gutanga ubuhamya. Imana yagiye imukorera utuntu tw'ibitangaza twatumye atangira gu Questioning satani, gusa ndagira ngo mbabwire ko satani nta mbaraga agira. Rero tugomba vuba cyabe kumubatiza. Biramukuraho amaraso yuhagiwe" Yahise amubaza ati 'Uremeye kubatizwa mu izina rya Data, Umwana n'Umwuka Wera?' Mutoni ati 'Ndabyemeye' (...).

Yapfukamye hasi yakira agakiza asengerwa na Apotre Gitwaza 

UMVA HANO UBUHAMYA BWA MUTONI UVUGA KO YABAGA IKUZIMU