Tehillah DPM yateguye umugoroba wo kuramya no guhimbaza Imana

Rene Patrick  umuyobozi wa Tehillah DPM yabwiye inyarwanda.com ko uyu mugoroba wo kuramya no guhimbaza Imana wahawe izina rya The Overflow bisobanuye Isenderezwa, bakaba bagiye gukora igitaramo nk’iki ku ncuro ya kabiri aho bazaba bari gusenga Umwami Imana ngo izabagenderere itembeshe imigezi yayo isendere muri buri wese uzahagera. Rene Patrick yagize ati:

Mu buryo bw’imiririmbire ndetse n’umuziki twagendeye mu ijambo riri muri Zaburi 33:3 ari naryo jambo Tehillah igenderaho ngo turirimbire Uwiteka indirimbo nshya, ducurangishe ubwenge(Skills) akaba ari muri urwo rwego indirimbo zizakoreshwa zizaba ziryoheye amatwi kuko Imana ikwiye ibyiza birenze ibindi twabasha kuyiha tukaba turi gukora uko dushoboye kose ngo bizabe biryoshye. Kubw’ubuntu bw’Imana, twizeye kuzagira ibihe byiza mu buryo bwo gusabana n’Imana.

Bamwe mu baririmbyi bagize Tehillah Dawn Platform and Ministries

Muri iki gitaramo “Tehillah Prophetic Evening” cyo kuri iki cyumweru tariki ya 18 Ukwakira 2015, mu nsanganyamatsiko yiswe The Overflow  hazaha bari abahanzi batandukanye barimo Aime Uwimana, Luc Buntu, Zion Boys, Ssali, Brenda Indekwe n’abandi.

Tehillah Dawn Platform and Ministries ni urubuga rumaze umwaka n’amezi asaga icumi mu ntego yo gushyigikira abaririmbyi baturuka mu matorero atandukanye mu kububakira umurimo w’uburirimbyi ku ndangagaciro ziranga umukozi w’Imana no kubungura ubumenyi mu bijyanye no kuririmba ndetse akaba ari n’itsinda riramya rikanahimbaza Imana.

Hano ni mu gitaramo Tehillah DPM yakoze umwaka ushize kuri Women Foundation Ministries