Pastor Hortense uherutse gusezera kuri Gitwaza ngo uwamuha Miliyoni nyinshi yabwiriza abakene akabafashisha n’ibifatika

Pastor Hortense Mazimpaka wari umuyobozi wa Zion Temple Karongi mu gihe kingana n'imyaka hafi 6, tariki 13/5/2017 ni bwo yandikiye Apotre Dr Gitwaza ibaruwa imusezeraho. Nyuma y'aho Pastor Hortense yahise atangiza itorero Believers Worship Centre. N'ubwo hari abantu batari bacye bijujutira abakozi b'Imana bigisha ku mafaranga, Pastor Hortense Mazimpaka avuga ko amafaranga akenewe cyane mu ivugabutumwa. 

Pastor Mazimpaka Hortense aratangaza ko uwamuha amafaranga menshi cyane (za miliyoni nyinshi) yabasha gukora ibidasanzwe akagarura abantu bo mu ngeri zinyuranye ku Mana kandi akabafasha no mu buryo bufatika. Pasiteri Hortense avuga ko amafaranga akenewe mu murimo w’Imana kuko akora ibintu byinshi ku buryo aramutse abuze hari byinshi byahagarara. Kuri we ngo uwamuha za miliyoni nyinshi yakora ibidasanzwe mu murimo w’Imana. Yagize ati:

Uwampa za miliyoni na za miliyoni nkabwira abakene ubutumwa bwiza nkabafashisha n’ibifatika,…uwampa za miliyoni na za miliyoni ngasanga abakire batazi kuganira n’abadafite amafaranga…nkaganira na bo turi mu rwego rumwe…ngategura ibiterane bisobanutse…ngategura ibikorwa bisobanutse birimo amafaranga nkabasha kubwira abakire ubutumwa bwiza kuko na bo barabukeneye…uwayampa menshi cyane ngakorera Imana byinshi. 

Pastor Hortense ngo uwamuha amafaranga menshi yayakoresha mu ivugabutumwa

Pastor Hortense Mazimpaka avuga ko Imana ikeneye impano za buri muntu wese wifuza kuyikorera kugira ngo umurimo wayo ujye mbere atibagiwe n’ubutunzi bwe kuko ngo nabwo buri mu mpano yahawe. Izindi mpano zishobora kuba izo kwamamaza ubutumwa, ubutunzi, icyubahiro n’ibindi umuntu yakoresha mu ivugabutumwa. Nk'uko tubikesha Ibyishimo.com, Pastor Hortense yagize ati:

Impano zose Imana yaguhaye, ubwengwe bwase Imana yaguhaye, umwanya wose Imana yaguteretsemo mu bwami bw’Imana birakenewe, yemwe n’amafaranga Imana yaguhaye ubwami bw’Imana burayakeneye. 

Pastor Mazimpaka Hortense hamwe n'umutware we

Ibi uyu mupasiteri abishingira mu bihamya biboneka muri Bibiliya aho abakurikiraga Yesu bamufashishaga ibyo bari batunze bityo ngo nk’uko ubwami bw’Imana bwo muri icyo gihe bwari bukeneye amafaranga ngo n’ubw’iki gihe burayakeneye. Icyakora ngo muri iyi minsi abayoboke b’amadini basigaye bakunda ababwiriza batavuga iby’amafaranga nyamara abayavuga bakabita abatekamutwe, gusa ngo bakwiriye kumenya ko ubwami bw’Imana bukeneye amafaranga.

Mazimpaka avuga ko iyaba ubutunzi butari bukenewe, ngo ntabwo Yuda aba yarahawe umufuka wo kubikamo ubutunzi cyangwa se ngo Dawidi abe yararundanyije izahabu ngo yubake inzu y’Uwiteka Salomo yubatse. Asoza iyi ngingo Pasiteri Hortense yavuze ko Imana ikeneye buri muntu wese n’impano, ubwenge n’ubushobozi bimurimo kugira ngo ubwami bw’Imana bwaguke.

Ibaruwa Pastor Hortense yanditse muri 2017 asezera kuri Gitwaza

Pastor Hortense yayoboye Zion Temple Karongi hafi imyaka 6