Padiri Uwimana Jean Francois ukora umuziki uhimbaza Imana mu njyana ya Hiphop n'izindi zinyuranye, yagaragaye ari ku nyanja y'u Buhinde muri Tanzania ndetse anifotoreza ku ishusho y'umusirikare yibutsa intambara ya mbere y'isi.
Uwimana Jean Francois, umupadiri muri Kiliziya Gatorika muri Diyoseze ya Nyundo, yatembereye muri Tanzania ku nyanja y'u Buhinde afata urwibutso ku ishusho y'umusirikare yibutsa intambara ya mbere y'isi. Uyu mupadiri yagaragaye mu mujyi wa Dar Es Salaam muri Tanzania kuri uyu wa kane tariki 6/9/2018 ndetse agaragara no kuri Ambasade ya Canada, anaboneka yifotoreza ku nyanja y'u Buhinde hafi y'icyambu cya Dar Es Salaam no mu mujyi rwa gati ku ishusho y'umwe mu basirikare ba Tanzania bitanze mu ntambara ya mbere y'isi yo mu 1914-1918.
Padiri Uwimana ku ishusho y'umwe mu basirikare ba Tanzania bitanze mu ntambara ya mbere y'isi
Ababonye amafoto ya Padiri Uwimana bamwibajijeho byinshi ari nabyo byaduteye amatsiko yo kuganira na we adutangariza byinshi kuri aya mafoto. Mu kiganiro Inyarwanda.com yagiranye na Padiri Uwimana, yadutangarije ko yagiye muri Tanzania mu rwego rwo gutembera. Yunzemo ko amafoto ye yafatiwe ku nyanja y'u Buhinde azayakoresha mu ndirimbo ye. Ati: "Nari ndi muri Tanzania, ni ugutembera no gufata amafoto. Ifoto (ifoto y'umusirikare) nabonye ari a good memory for my visit nk'ishusho yibutsa intambara ya 1 y'isi. Amafoto yo ku mazi yo nshaka kuzayakoresha mu yindi ndirimbo."
Padiri Uwimana ukora injyana zinyuranye zirimo Hiphop, Reggae, Zouk, Pop, Rap n'izindi azwi mu ndirimbo zitandukanye zirimo: Gusenga, Uhoraho, Twigendere, Mwami ubasumba, Imana yanjye n'izindi. Aherutse gushyira hanze indirimbo nshya yise ‘Ngwino unsange’ irimo amagambo y'imitoma. Indirimbo ye 'Gusenga' isaba abantu kudakanga Imana mu gihe cy'amasengesho yabo, ni yo yatumbagije izina rye mu muziki nyarwanda. Umuziki wa Padiri Uwimana ukunzwe cyane n'urubyiruko rwo muri Kiliziya Gatorika.
Padiri Uwimana ku nyanja y'u Buhinde, ngo yari yatembereye
TANGA IGITECYEREZO