Exclusive:Umugabo ugiye gukora ubukwe na Apotre Liliane yasubije abamushinja guta urugo no kurusahura-VIDEO

Mu minsi ishize Inyarwanda.com twabagejejeho inkuru y'ibyatangajwe na Apotre Liliane Mukabadege ushinjwa gutwara umugabo w'abandi. Umugabo ashinjwa gutwara ni uwo bagiye kwambikana impeta mu minsi iri micye imbere. Uwitwa Mukamana Annociata ashinja Apotre Liliane kumutwarira umugabo. Apotre Liliane uyobora itorero Umusozi w'Ibyiringiro mu Rwanda, yahakanye aya makuru yivuye inyuma ashimangira ko 'umuntu nk'Apotre adashobora gukora ikosa ryo gutwara umugabo w'abandi'. 

Ubwo Mukabadege Liliane yimikwaga akagirwa 'Intumwa'

REBA HANO IBYO APOTRE LILIANE YADUTANGARIJE

Kuri ubu rero tugiye kubagezaho inkuru ikubiyemo ibyatangajwe n'umukunzi mushya wa Apotre Liliane bagiye kwambikana impeta, uyu mukunzi we ashinjwa guta urugo no kurusahura. Mu kiganiro na Inyarwanda.com uyu mugabo yabyamaganiye kure avuga ko ababimushinja bagamije kumuharabika no kumwicira ubukwe. Yunzemo ko yamaze kubajyanya mu nkiko kugira ngo arenganurwe na cyane ko nawe avuga ko yasahuwe.

Umugabo witwa Ndahimana Jean Bosco w'imyaka 47 y'amavuko ni we ugiye kwambikana impeta na Apotre Liliane Mukabadege. Yaduhamirije ko agiye gukora ubukwe na Apotre Liliane Mukabadege. Ngo hashize imyaka irenga 25 baziranye ndetse ngo ni we yari agiye gushaka, ntibyakunda. Abajijwe icyo yamukundiye, yagize ati: "Twakundanye kuva kera akiri inkumi nanjye nkiri umusore,..yari umukobwa mwiza witonda ufite umuco n'umurava." Ndahimana yadutangarije ko mu 1995 ari bwo umugore we (Aregisiya Mukaremera) yitabye Imana. Gusa ngo ntabwo bari bagasezeranye imbere y'amategeko. 

Apotre Liliane agiye gukora ubukwe nyuma yo gutandukana na Apotre Abraham

Ndahimana avuga ko yafunzwe nyuma y'iminsi ibiri umugore we yitabye Imana. Yamaze muri gereza imyaka 13, arekurwa muri 2007 nyuma yo kugirwa umwere nk'uko abitangaza. Hagati aho ariko ngo Mukamana Annociata, mukuru w'umugore we (Aregisiya Mukaremera) yaje mu rugo rwe arwaza murumuna we (umugore wa Ndahimana) ndetse ngo ubwo Ndahimana yari muri gereza,uyu Mukamana Annociata yakomeje kuba muri urwo rugo rwashatsemo murumuna we. Aganira na Inyarwanda.com, Ndahimana yarahiye arongera ararahira, avuga ko atari umugabo wa Mukamana Annociata ahubwo ashimangira ko umugore we yitabye Imana. Yunzemo ko atigeze asezerana mu mategeko na Mukamana, yewe ngo nta n'ubwo bigeze baryamana. Yagize ati:

Oya ntabwo (Mukamana Annociata) ari umugore ngiye guta kuko umugore wanjye nari mfite nakubwiye ko yitabye Imana. Amaze kwitaba Imana, uwo nguwo (Mukamana Annociata) yari mukuru we yaje aje kumurwaza muri icyo gihe cyose muri ibyo byago nagize byo gufungwa. Imyaka avuga ko tumaranye, ni ukwiyitirira! Nonese wowe waba umaranye n'umuntu imyaka 23 mutaryamana, ni ikihe gihe avuga ko ari umugore wawe? Iyo mushaka mba naramusabye, cyangwa nkamukwa cyangwa tugakora ino mihango ikorerwa abashakanye.

Ndahimana yabwiye Inyarwanda.com ko yamaze kugeza mu nkiko uyu Mukamana. Ngo amushinja ibintu byinshi harimo no kumusahura imitungo ye. Yagize ati: "Naramureze n'ubu turi mu rukiko. Namuregeye ibintu byinshi kuko yansahuye imitungo yanjye antwara ibyangombwa by'ubutaka. Amaze kugurisha inka eshanu, ariko izo nabonye baguze ni inka ebyiri, izindi abaziguze bagiye kuzibaga. Hagati aho ngaho navanywe mu rugo iwanjye, nirukanywe n'abasirikare. Yahuruje abasikare n'abapolisi b'umurenge,...Ni cyo gituma niyambaje amategeko. Ikirego nagitanze kuri 23/06/2018."

Ndahimana avuga ko ari umukristo mu itorero Zion Temple i Gitarama. Kuba agiye gushaka Apotre Liliane twamubajije uko abifata asubiza agira ati: "Mbifata neza nk'umuntu w'umukunzi nakunze kandi nanjye nkaba ndi umukristo wemera Kristo." Abajijwe aho ubukwe bwe na Apotre Liliane buzabera, yagize ati: "Turacyabitegura ariko gusaba no gukwa ni iwabo i Gitarama"

REBA HANO IKIGANIRO TWAGIRANYE N'UMUGABO WA APOTRE LILIANE