RFL
Kigali

Gisubizo Ministries bateguye igitaramo gikomeye 'Worship Legacy' batumiyemo amatsinda akunzwe mu Rwanda

Yanditswe na: Mupende Gedeon Ndayishimiye
Taliki:17/05/2018 15:23
0


Gisubizo Ministries imwe mu matsinda akomeye hano mu Rwanda, igiye gukora igitaramo ngarukamwaka bise 'Worship Legacy Concert' kizaba tariki 27 Gicurasi 2018. Ni igitaramo batumiyemo amatsinda anyuranye afite abakunzi batari bacye hano mu Rwanda.



Iki gitaramo kizabera mu mujyi wa Kigali i Nyarutarama kuri Christian Life Assembly (CLA) kuva Saa munani z'amanywa. Gisubizo Ministries izaba iri kumwe na Healing worship team, Alarm Ministries, True Promises na The Blessing Family. Pastor Aaron Ruhimbya ni we uzigisha ijambo ry'Imana. Kwinjira muri iki gitaramo ni 2000Frw mu myanya isanzwe ndetse na 5000Frw mu myanya y'icyubahiro.

Gisubizo Ministries

Gisubizo Ministries imwe mu matsinda akomeye mu karere

Mu kiganiro na Inyarwanda.com, Ngabire Vincent umuhuzabikorwa w'igitaramo 'Worship Legacy Concert' kiri gutegurwa na Gisubizo Ministries, yadutangarije ko muri icyo gitaramo bazaba bafata amajwi n'amashusho by'album yabo ya gatatu igizwe n'indirimbo 12. Yagize ati: "Tuzaba turimo gufata amajwi n'amashusho y'album yacu ya gatatu igizwe n'indirimbo 12." Twamubajije agashya bahishiye abantu muri iki gitaramo, adusubiza muri aya magambo:

Abantu bamaze kuza mu bitaramo byacu, uyu ni umwaka wa gatatu dukora igitaramo muri uku kwezi kwa Gatanu kuri aya matariki, ubwo ni concert ngarukamwaka, ni yo mpamvu twanafashe izina rimwe rihoraho 'Worship Legacy' (Gusiga umurage wo kuramya Imana no guhimbaza), mu by'ukuri nk'uko nabivuga izindi concert zishize, twagiye duhimbaza Imana mu buryo bwiza abantu bagasabana n'Imana cyane.

Ngabire Vincent yakomeje avuga ko indirimbo bazaba bafatira amashusho, bateganya ko nyuma y'amezi 3 ari bwo izo ndiirmbo zizajya hanze. Iki gitaramo bagiye kugikora nyuma y'ibikorwa by'urukundo bakoze mu minsi ishize birimo n'igikorwa bakoze tariki 31 Mata 2018 cyo koroza ihene abaturage batishoboye bo mu kagari ka Butare mu murenge wa Nduba mu karere ka Gasabo.

Abaririmbyi ba Gisubizo Ministries boroje abaturage batishoboye b'i Nduba-AMAFOTO

Gisubizo Ministries mu gikorwa cyo koroza abatishoboye

Gisubizo Ministries ni umuryango ukora ivugabutumwa mu buryo butandukanye burimo no kuririmbira Imana. Bakorera mu bihugu binyuranye ku isi. Kugeza ubu bamaze guhabwa ibihembo byinshi mu muziki yaba ibitangirwa hano mu Rwanda ndetse no ku rwego rw'akarere u Rwanda ruherereyemo. Bamaze gukora ingendo nyinshi z'ivugabutumwa hirya no hino mu gihugu cy'u Rwanda ndetse no hanze yarwo. Aba baririmbyi bakunzwe mu ndirimbo zinyuranye zirimo: Ndaguhetse ku mugongo, Amfitiye byinshi, Narababariwe n'izindi.

Gisubizo Ministries
Igitaramo Gisubizo Ministries yateguye








TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND