Apotre Gitwaza yahamije ko iyo yanga kwimika Bizimana Abraham n’umugore we Liliane yari kuba ari imbwa afite na shitani -AMAFOTO

Uyu muhango wo kwimika Liliane na Abraham bagizwe Intumwa z’Imana(Apotres), wahujwe no gutaha kumugaragaro inyubako nshya y’urusengero Umusozi w’ibyiringiro rwa Kimisagara. Aba bakozi b’Imana basutsweho amavuta bagahinduka Intumwa z’Imana, bombi babana nk’umugabo n’umugore mu buryo bwemewe n’amategeko ya Leta n’itorero.

Umuhango wo kubimika wabereye Kimisagara ku itorero Umusozi w’ibyiringiro kuva isaa sita z’amanywa. Apotre Dr Paul Gitwaza umuyobozi mukuru wa Zion Temple niwe wimitse aba bakozi b’Imana bombi abasukaho amavuta ahereye kuri Bizimana Abraham akurikizaho umugore we Liliane Mukabadege,abasaba kwicisha bugufi kuko izina bahawe (Apotre) atari iry’icyubahiro nk’uko bamwe babifata ahubwo ari akazi kabasaba kuba abagaragu b’umukumbi baragiye.

Apotre Liliane Mukabadege na Apotre Abraham Bizimana basabwe kwicisha bugufi kuko izina Apotre atari iry'icyubahiro ahubwo ari akazi

Rev Bizimana Abraham wagizwe intumwa y’Imana (Apotre), agiye kuyobora umuryango mpuzamahanga witwa “Repentance and Holliness International Ministry”, yabwiye inyarwanda.com ko uyu muryango we ugizwe n’abasaga 100 mu gihe gito umaze utangijwe.

N’ubwo utaratangiza itorero, uyu muryango ushyize imbere gukangurira abo mu matorero atandukanye kurangwa n’urukundo rw’Imana ndetse no kurwanya bombori bombori zivugwa mu matorero. Izi ntego z’iyi Minisiteri zikaba zashimwe cyane na Apotre Gitwaza wavuze ko ari gahunda nziza izafasha benshi mu bakristo kuko izabakangurira kurangwa n'ibikorwa by'urukundo,gufashanya no kubana mu mahoro. 

Apotre Bizimana Abraham(hagati) agiye gushishikariza benshi kurangwa n'urukundo

Uyu muhango wari witabiriwe cyane, urusengero rwari rwuzuye, abandi bahagaze hanze

Bishop Liliane Mukabadege nawe wimikiwe kuba Apotre, yagizwe umuyobozi mukuru w’itorero Umusozi w’ibyiringiro mu Rwanda no mu mahanga. Liliane Mukabadege  wahoze muri ADEPR nyuma agatangiza itorero, yabwiye inyarwanda.com ko kuba Apotre bigiye kumufasha gutangiza amatorero menshi ku isi, aho mu minsi micye ngo agiye kuritangiza mu Bubiligi.

Nyuma yo kwimikwa akaba Apotre, Mukabadege Liliane yatangaje ko agiye gutangiza amatorero menshi

Apotre Dr Paul Gitwaza yatangaje ko Apotre Liliane na Apotre Bizimana bafite rukuruzi(imbaraga z'Imana) bitewe no kuba yitabiriye ubutumire bwabo bwo kubimika mu gihe muri iyi minsi mu itorero Zion Temple bahugijwe cyane n’igiterane Afrika Haguruka. Iki giterane ngo kibatwara imbaraga nyinshi kuburyo n’abakristo babo bitabye Imana batajya babashyingura mu minsi y’igiterane Afrika Haguruka.

Apotre Dr Paul Gitwaza yavuze ko Apotre Bizimana na Apotre Liliane bafite rukuruzi(imbaraga z'Imana)

Kuba yitabiriye iyimikwa ryabo, Apotre Gitwaza yavuze ko ari rukuruzi ibarimo kandi nta yindi usibye imbaraga z’Imana zibarimo zikaba arizo zamukuruye. Apotre Gitwaza yavuze ko ubusanzwe atajya yitabira cyane imihango yo kwimika abandi bashumba kereka ngo iyo Imana yabimushyize ku mutima, ndetse ahamya ko ariko byagenze ajya kwemerera Liliane na Abraham kuzabasukaho amavuta.

Rukuruzi yatumye Apotre Gitwaza yimika Apotre Bizimana na Apotre Liliane, ngo ni ukuba Liliane yaragaragarije urukundo abakristo ba Zion Temple, akajya mu butayu gusengera Gitwaza igihe hari hashize iminsi yanditsweho ko ajya ikuzimu ndetse ko iwe mu rugo haba isanduka yiberamo. Gitwaza ati “Uwo niwo mutima w’intumwa, umutima wa kibyeyi,niyo mpamvu ndi hano”

"Apotre Liliane Mukabadege na Apotre Bizimana Abraham bafite umutima wa kibyeyi" Apotre Gitwaza

Ubwo Apotre Liliane yari mu butayu arimo gusenga arira cyane ababajwe no kuba Gitwaza aharabikwa kandi ari umukozi w’Imana wasizwe, abakristo ba Zion Temple bari kumwe na Liliane aho mu butayu, bumvise isengesho rye kandi batari baziranye, bakorwaho cyane bajyana iyo nkuru kuri Apotre Gitwaza bamubwira ko hari abapasiteri bamukunda cyane. Nyuma y’iminsi micye, Liliane n’umugabo we Bizimana bagiye gusaba Gitwaza ko yazabimika, undi abemerera gutyo kuko yari yamaze kumenya neza ko bafite umutima wa gishumba. Apotre Gitwaza ati:

Muri biriya bihe hari abansetse benshi, ariko dore abarize, ni umutima w’ikibyeyi, none uyu muntu yakubwira wowe ngo ngwino unshireho amavuta ukanga? waba urimo shitani nawe. Wakwanga ari wowe?Wanze waba ubaye ya mbwa. Hari imbwa ebyeri, iya mbere ni umuntu usaba uwo yimye, iya kabiri ni uwima uwamuhaye. Sinshaka kuba imbwa rero, ndashaka kuba umukozi w’Imana. Bwoko bw’Imana sinizimba mu magambo menshi ndagira ngo mbabwire ko kuza kwacu kurimo ibintu byinshi gushingiyemo impamvu nyinshi kandi z’ukuri. Turishimira uyu murimo ni umurimo wacu twese, ikizakora kuri iri torero kizaba ari ikinkozeho, ntiwashyingira umwana wawe ngo ejo niwumva afite ibibazo unezerwe nawe urababara, ubu naje gushyingira iri torero kuko ikibazo bazagira kizaba kinkozeho directement(ako kanya), Imana ibahe umugisha.

Apotre Paul Gitwaza ati"Iyo ntabimika nari kuba ndi imbwa, kandi nari kuba mfite shitani kuko aba bantu bafite rukuruzi"

Mu kiganiro n’itangazamakuru, Apotre Gitwaza yavuze ko ari byiza cyane kuba mu Rwanda hari kuboneka Intumwa z’Imana nyinshi akaba ari ikimenyetso cy’uko itorero ryo mu Rwanda ritangiye gukura cyane cyane muri aya matorero ya Gikristo mashya akaba atangiye guhagarara ku rufatiro rukwiriye kuko Intumwa n’abahanuzi zahozeho kera. Kuba hari abavuga ko nta mugore ukwiye kuba umushumba w'itorero, Apotre Gitwaza yavuze ko ibyo ntaho bihuriye n'ijambo ry'Imana ahubwo ashima Imana kuba mu Rwanda hamaze kuboneka ba Apotre benshi b'abagore bakunda Imana. 

REBA HANO HEPFO ANDI MAFOTO Y'UMUHANGO WO KWIMIKA APOTRE BIZIMANA ABRAHAM NA APOTRE LILIANE MUKABADEGE

Abatumirwa banyuraga banyuraga ku itapi itukura

Apotre Bizimana Abraham mbere yo kwimikwa

Apotre Mukabadege Liliane mbere yo kwimikwa

Iyi modoka ni iya Apotre Paul Gitwaza

Apotre Paul Gitwaza yahise yakirwa na Apotre Bizimana Abraham, abakristo benshi bifuzaga kumubona(Gitwaza)

Abakristo bari mu rusengero bari bategerezanyije amatsiko kwakira Apotre Gitwaza

Urwo rusengero rufite n'agasanduku k'ibitekerezo by'abakristo

Aba ni bamwe mu badiyakoni bari bashinjwe umutekano mu rusengero

Apotre Dr Paul Gitwaza ataha kumugaragaro urusengero rw'Umusozi w'ibyiringiro

Apotre Mukabadege, Apotre Gitwaza na Apotre Bizimana Abraham bamaze kugera mu rusengero

Apotre Paul Gitwaza hamwe na Apotre Bizimana Abraham

Uyu niwe mushyushyarugamba w'uyu muhango wo kwimika abakozi b'Imana

Hakurikiyeho umwanya w'indirimbo z'amakorali

Abacuranzi nabo bari bahagaze neza

Uyu muhango wari witabiriwe n'abakozi b'Imana batandukanye

Abantu batangiye kujya mu mwuka wo guhimbaza Imana

Uyu muhango wo kwimika aba Apotre wari witabiriwe n'abakristo batari bacye

Icyapa cy'itorero Umusozi w'ibyiringiro

Apotre Claude Kamuhanda nawe yahise ahasesekara

Apotre Claude Kamuhanda asuhuzanya na Apotre Gitwaza

Apotre Kamuhanda asuhuzanya na Apotre Bizimana Abraham

Izi nyubako nizo zituranye n'iri torero

Inyuma y'urusengero Umusizi w'ibyiringiro rwa Kimisagara ni uku hameze

Pasiteri Israel uherutse gusezera muri iri torero nawe yari yitabiriye ibi birori

Mu gutaha uru rusengero, Apotre Gitwaza yasabye abantu bose gukuramo inkweto bagaha Imana icyubahiro

Abantu bose bahise bakuramo inkweto nk'ikimenyetso cyo gucira Imana bugufi no kuyiha icyubahiro

Apotre Gitwaza yigishije uburyo mu itorero, hakwiye kubamo impano zose z'umwuka uko ari eshanu

Igihe itorero riyobowe n'impano imwe gusa, urugero Pasiteri gusa, cyangwa se Intumwa gusa, aho ngo niho itorero ripfira

Iyo Intumwa ifatanyije n'abahanuzi, abashumba, abavugabutumwa, itorero rirushaho gutera imbere

Icyo cyigisho cyafashije imitima ya benshi barushaho gusobanukirwa icyo Intumwa bivuze

Benshi bari bateze yombi bakurikirana Apotre Gitwaza

Uyu musore ni umwe mu baje baherekeje Apotre Gitwaza

Pastor Israel wasezeye mu itorero Umusozi w'ibyiringo, yari ahabaye

Umuhango wo kwimika Mukabadege na Bizimana wahise utangira

Apotre Paul Gitwaza yerekana ihembe ririmo amavuta yo gusuka kuri Liliane na Abraham

Rev Israel wasezeye burundu muri iri torero byamwanze mu nda arahaguruka arafotora

Uyu ni umwe mu ba Bishop bari bitabiriye uyu muhango

Bishop Liliane Mukabadege na Rev Bizimana Abraham basabwe gupfukama hasi basukwaho amavuta

Bishop Liliane Mukabadege na Rev Bizimana batuweho isengesho ry'ubuhanuzi

Buri wese yarimo kwirebera uyu muhango

Ubwo basukwagwaho amavuta

Abavugabutumwa b'abasore baje baherekeje Apotre Gitwaza ni bamwe mu bakoze cyane akazi k'ubudiyakoni

Nyuma yo kwimikwa baramukanyije na Apotre Gitwaza wabimitse

Liliane Mukabadege yateye za Haleluya nyinshi cyane ashima Imana imugize Intumwa yayo

Nyuma yo kwimikwa, Apotre Liliane Mukabadege yambitswe umwenda w'abatambyi

Abakristo bari bitabiriye uyu muhango  ku bwinshi

Apotre Liliane Mukabadege yahawe n'inkoni y'ubushumba

Apotre Abraham Bizimana yambitswe umwambara w'abatambyi

Abakristo bose bari bizihijwe n'uyu muhango

Apotre Bizimana Abraham yahawe nawe inkoni y'ubushumba

Apotre Dr Paul Gitwaza hamwe na Apotre Mukabadege na Apotre Bizimana ndetse n'aba Bishops bitabiriye uyu muhango

Hakurikiyeho umwanya wo gutanga impano, Apotre Bizimana Abraham ashimirwa n'Itorero kuba yararihariye umwenda wa Miliyoni 14 

Iri niryo shimwe bageneye Apotre Bizimana Abraham

Umuhungu wa Apotre Mukabadege yamushimiye kuba yaramubaye hafi akamurera mu mwuka no mu buryo bw'umubiri

Hatanzwe impano zitandukanye, bamwe bazanye igitoki, abandi batanga Intama(itungo rigufi)

Korali nkuru ku itorero Umusozi w'Ibyiringiro, yahaye igikombe Apotre Mukabadege kubera urukundo bamukunda

Abatangaga impano bari benshi cyane kandi bazitangaga banezerewe cyane kubera amazina mashya y'abashumb babo