Amateka ya korali Christus Vincit igiye kumurika album ya mbere y'umwihariko bise 'Come All You Who Thirst'

Irankunda Kayonga Jean d'Amour, umuyobozi wa korali Christus Vincit yatangarije Inyarwanda.com amateka y'iyi korali ndetse anatangaza byinshi ku gitaramo bari gutegura kizafasha abantu kwinjira muri Noheli. Iki gitaramo kizaba tariki 24/12/2017, kibere i Remera kuri Centre Urumuli munsi ya Centre Christus. Buri mwaka basanzwe bakora igitaramo nk'iki kinjiza abantu muri Noheli, gusa umwihariko w'igitaramo cyo muri uyu mwaka wa 2017 ni uko bazaba bamurika album yabo ya mbere.

UMVA HANO 'COME ALL YOU WHO THIRST' YA CHRISTUS VINCIT

Incamake y'amateka ya korali Christus Vincit igizwe n'abasaga 200

Christus Vincit choir mu kinyarwanda bishatse kuvuga ngo 'Kristo watsinze'.  Iyi korali yatangiye kuririmba mu mwaka w' 2012 itangirira i Remera kuri Centre Christus, Centre y'aba JESUITS (The Society of Jesus) iri munsi ya Stade Amahoro. Kuri Pasika muri 2012 ni bwo Christus Vincit choir yaririmbye ku nshuro yabo ya mbere muri Misa bivuze ko iyo pasika igeze biba ari isabukuru yabo.

Korali Christus Vincit

Christus Vincit choir yatangijwe n'abantu 7 bari bishyize hamwe kuko babonaga bafite ikibazo cyo kuba badafite aho bumvira misa, nuko bishyira hamwe batangira korali gutyo bayita Christus Vincit choir. Kugeza ubu korali Christus Vincit igizwe n'abantu basaga 200. Bafite kandi na Diaspora kuko bagiye bagira amahirwe bamwe mu baririmbyi babo bakajya kwiga hanze y'u Rwanda. 

Umva hano 'The Virigin Mary had a baby' ya Christus Vincit choir 

Irankunda Kayonga Jean d'Amour yabwiye Inyarwanda ko Christus Vincit choir ikora ibikorwa byinshi bitandukanye birimo gufasha abakristo Gatorika gusabana n'Imana binyuze mu ndirimbo nziza, ibikorwa byo gusura abarwayi, gufasha imfubyi ndetse no mu gihe cy'icyunamo. Iyi korali igira uruhare rukomeye cyane mu gufasha abarokotse Jenoside yakorewe abatutsi mu rwego rwo kurushaho gukira ibikomere batewe na Jenoside yakorewe abatutsi mu 1994.

Christus Vincit choir igiye kumurika album ya mbere

Iyi korali irimo ingeri nyinshi zitandukanye; urubyiruko, abantu bakuze ndetse n'abanyeshuri. Ntawe baheza kuko ngo abantu bose bisanga. Gukuza ubuvandimwe hagati yabo n'imibanire myiza, ni bimwe mu biranga abagize iyi korali. Indirimbo bakoresha mu Misa no mu bitaramo ni izahimbwe n'abaririmbyi batandukanye muri Kiliziya Gatorika ndetse n'izabo zigeze nko kuri 7 bafata nk'umwimerere wabo. 

Ni abahe bandi bazafatanya na Christus Vincit choir mu gitaramo igiye gukora?

Twabibutsa ko album yabo ya mbere bazayimurika tariki 24/12/2017 mu gitaramo kizabera kuri Centre Urumuli munsi ya Centre Christus i Remera. Ni igikorwa cyateguwe neza kandi kirimo n'andi makorali menshi harimo; Korali y'Abarundi babarizwa mu Rwanda, Bright Five Singers, Korali St Vincent Palloti ibarizwa Gikondo, Korali Divine Mercy ibarizwa Regina Pacis, bazaba bari kumwe kandi n'abanyamuziki babiri ari bo Kabeza Joachim na Patrick, abasore bazi umuziki ku rwego rushimishije. 

Bamwe mu bagize Christus Vincit choir

Ni iki cy'umwihariko kiri muri album yabo bagiye kumurika bise Come All You Who Thirst?

Irankunda Kayonga Jean d'Amour perezida wa Christus Vincit choir asubiza ikibazo yari abajijwe na Inyarwanda.com, yagize ati: "Ni album navuga ko iryoshye kuyumva ku muntu ukunda umuziki, ni album iryoheye amatwi, ni album udashobora kubona ahandi. Kuko ni gacye cyane ushobora kuba wakumva indirimbo, ukaba wayumva inshuro zirenze imwe, muri album yacu dufite indirimbo ushobora kumva inshuro zirenze imwe, iyo uri umuntu ukunda umuziki. Dufitemo indirimbo ziri mu ndimi zitandukanye; Ikigande, Iringala, Igiswahili n'Icyongereza. (...) Ni igitaramo kizaba kiryoheye ijisho ku bazaba bahari, ni igitaramo navuga ngo ni imbaturamugabo, kizarangwa n'umuziki mwiza unogeye amatwi. Kwitabira iki gitaramo ni ubuntu. Gutangira ni saa kumi n'ebyiri.CD izaba igura 5000Frw."

Irankunda Kayonga Jean d'Amour uyobora korali Christus Vincit choir

Umva hano 'The Virigin Mary had a baby' ya Christus Vincit choir

Indirimbo ziri mu kinyarwanda ngo ntabwo bakunda kuzikora cyane ahubwo  bibanda cyane ku ziri mu cyongereza. Abajijwe impamvu bibanda cyane mu gukora indirimbo ziri mu rurimi rw'icyongereza, Irankunda Kayonga Jean d'Amour yasubije iki kibazo muri aya magambo: "Impamvu tutibanda cyane ku ndirimbo z'ikinyarwanda ahubwo tukibanda cyane mu gukora iziri mu cyongereza, nuko abantu tuba turirimbira cyangwa se dusengana, bose bavuga/bumva icyongereza ariko ni yo tugiye aho bumva cyane ikinyarwanda, dufite indirimbo z'ikinyarwanda ni zo tubaririmbira."

Igitaramo cyabo hari isano gifitanye na Noheli ?

Kuba igitaramo cyabo kizaba tariki 24/12/2017 bugacya haba Noheli, twifuje kumenya niba hari isano icyo gitaramo gifitanye na Noheli kuko bagihuje n'ibihe bya Noheli, Irankunda Kayonga Jean d'Amour adusubiza muri aya magambo: "Isano rirahari cyane, iki gitaramo cyacu ari nacyo cyanyu ni igitaramo kitwinjiza muri Noheli mu cyongereza bakita Christmas Carols concert aho turirimba indirimbo zidufasha neza kwinjira muri noheli, tuzaba dufite kandi korali zitandukanye nazo zizaba zidufasha kwinjira muri noheli."

Usibye kuririmba banakora ibikorwa by'urukundo bagasura abarwayi ndetse bagafasha n'abatishoboye

Kabeza Joachim umunyamuziki utoza amajwi muri Christus Vincit choir, yabajijwe icyamukuruye kikamujyana muri iyi korali, asubiza muri aya magambo: "Imiririmbire yabo wayisanga hacye muri iki gihugu, muri style turirimbamo ntabwo iragera mu maparuwasu menshi mu Rwanda." Kabeza Joachim amaze imyaka 12 atangiye umuziki dore ko yawutangiye yiga mu mwaka wa mbere w'ayisumbuye. Yakomeje avuga ko ubuhanga mu mihimbire, amajwi meza y'abaririmbyi ba Christus Vincit choir ari bimwe mu byo abona nk'umwihariko wa korali ye n'andi makorali yose ya hano mu Rwanda.

Kabeza Joachim umutoza wa Christus Vincit choir

UMVA HANO 'COME ALL YOU WHO THIRST' YA CHRISTUS VINCIT