Abashumba n’abandi bimitswe muri Bethesda Holy church bibukijwe ko itorero atari koperative-AMAFOTO

Ni umuhango wabaye kuri uyu wa Gatandatu tariki 25/08/2018 ubera ku Gakinjiro ka Gisozi kuri Bethesda Holy church. Himitswe abashumba babiri, abadiyakoni bashya bagera kuri 16 n'abavugabutumwa bashya 6. Abashumba bashya bimitswe mu Itorero Ryera Bethesida ni uwitwa Habimana Fidele usanzwe ari umukozi w'Umuryango w'Abibumbye mu Rwanda, Ishami rishinzwe Iterambere ry'abaturage (UNDP), hamwe n'umugore we Nkulikiyinka Marie Claudine.

Bishop Rugamba Albert umushumba mukuru wa Bethesda Holy church

Abimitswe bose bahawe impanuro zizabafasha kunoza inshingano bahawe banibutswa ko itorero atari koperative. Abahawe inshingano z'ubupasitori ari bo Habimana Fidele n'uwo bashakanye, Nkulikiyinka Marie Claudine bahawe inkoni y'ubushumba ndetse na Bibiliya nk'intwaro izabafasha kuhangana n'umwanzi satani urwanya itorero rya Kristo.

Habimana Fidele n'umufasha we Nkulikiyinka Marie Claudine bahawe inshingano z'ubupasitoro

Umunyamabanga Mukuru w'amatorero y'abavutse ubwa kabiri (FOBACOR), Rev Patrick Joshua Twagirayesu, umwe mu bakozi b'Imana bitabiriye umurimo wo kwimika abashumba, abadiyakoni n'abavugabutumwa mu Itorero Ryera Betesida, mu ijambo rye, yihanjije abakristu ko Itorero atari Koperative buri muntu yemererwa gukora uko ashaka.

Avuga ko icyitwa ubuyobozi cyangwa demokarasi kigomba kuba mu nzego zindi ariko mu Itorero ry'Imana abantu bagomba gucyahwa no gutegekwa kugira ngo batigira ibyigenge. Reve Patrick Twagirayesu yamaganye gahunda yo kwishyira hamwe kw'abantu bagamije gushinga Itorero rya gikristu, kuko ngo Imana itigeze ihamagara abantu benshi icyarimwe. Yagize ati: "Nitudasubiza Itorero ku murongo waryo ntacyo tuzageraho mu byo dukora. Muri Bibiliya nta hantu Imana yigeze ihamagara abantu babiri icyarimwe, ntabwo Itorero ari koperative".

Rev Twagirayesu yavuze ko abakiristu bagomba gucyahwa, ari yo mpamvu mu Itorero ngo habamo ubutegetsi

Rev Twagirayesu yakomeje agira ati: "Abantu bose ni baba banganya ijambo, umwe azaba uwa Pawulo undi abe uwa Apolo, ntabwo Itorero rizigera rigira ubumwe ndakurahiye. Ku bw'ibyo umuntu umwe ni we ugira ihishurirwa akabibwira abandi bahuje bakamufasha." Avuga ko abagize Itorero bagomba kwemera bakumvira, bakirinda kwisumbukuruza no kwishyira mu myanya batagenewe y'icyubahiro mu gihe Imana atari yo yabibagize.

Rev Vincent Rwibasira, Umushumba mu Itorero Betesida

Ku rundi ruhande, Umushumba mu Itorero Betesida, Rev Vincent Rwibasira yashimangiye ko impamvu yo kuvuga ubutegetsi kurusha kuvuga ubuyobozi mu Itorero rya Gikirisitu, ngo baba birinda ko abantu bahinduka ibyigenge. Yagize ati: "Twemera ko umuntu yisiga uko ashaka, akambara uko ashaka n'indi myifatire ashaka, ariko ntabwo twemera umuntu unyuranya n'Ijambo ry'Imana. Niba ijambo ry'Imana rivuga ko tugomba kwiyubaha, ntabwo umuntu wambaye ubusa aba yiyubashye, ntabwo umuntu wisize nabi aba yiyubashye. Turacyaha kandi tukanahugura."

Inzego eshatu zitegeka itorero rya Gikristu

Abashumba bimitse bagenzi babo mu Itorero Ryera Betesida bavuga ko hari inshingano eshatu z'abayobozi b'Itorero zigaragara muri Bibiliya Yera mu gitabo cy'Ibyakozwe n'Intumwa ibice bitandatu ndetse no mu rwandiko rwa mbere Pawulo yandikiye Timoteyo 3:1-16. Umushumba Mukuru w'Itorero (Umwepiskopi) ni we ushyirwa mu rwego rwa mbere akaba ashinzwe kurireberera, kuritegeka no kuriha icyerekezo.

Urwego rwa kabiri ni rwo rw'abitwa aba Pasitoro bashinzwe gutegura, guteka no kugaburira intama. Umupasitoro azwiho kuba umwungeri uragira intama akazimenyera ubwatsi, amazi zinywa, umuti uzivura ndetse n’uburyo zibaho. Urwego rwa gatatu ni rwo rw'abadiyakoni bashinzwe guhereza cyangwa gutumwa muri buri murimo wose no ku bantu bose bagize Itorero.

REBA ANDI MAFOTO

Habimana Fidele yahawe inkoni y'ubushumba hamwe na Bibiliya

Nkulikiyinka Marie Claudine nawe yahawe inkoni y'ubushumba na Bibiliya

Abahawe inshingano bose bafashe ifoto y'urwibutso nyuma yo kwimikwa