Aline Gahongayire yasazwe n'ibyishimo yatewe na Apotre Mignonne UK wateye inkunga ikomeye 'Ineza Tour'

Mu gihe ari mu myiteguro y'igitaramo agiye gukorera i Muhanga mu Ntara y’Amajyepfo cyo gukusanya inkunga yo gufasha abatishoboye, akaba ari igitaramo yise ‘Ineza Tour’ yatumiyemo abaramyi batanu bazamufasha guhesha Imana icyubahiro, kuri uyu wa Kabiri tariki 17 Nyakanga 2018 Aline Gahongayire yatunguwe bikomeye na Apotre Alice Mignonne UK (Alice Mignone Umunezero Kabera) wateye inkunga ikomeye 'Ineza Tour' gahunda y'ivugabutumwa y'uyu muhanzikazi.

Apotre Mignonne yifatanyije na Gahongayire mu bikorwa by'Ineza Tour

Apotre Mignonne Alice Kabera uyobora Women Foundation Ministries na Noble Family church yakoze ibi ku bwo gushyigikira Aline Gahongayire mu bikorwa by'urukundo arimo gukora binyuze mu 'Ineza Tour' ikusanyirizwamo inkunga yo gufasha abana n'ababyeyi batishoboye. Apotre Mignonne yemereye Aline Gahongayire kumuha kimwe cya cumi (1/10) cy'amafaranga yose azakoresha mu ivugabutumwa azakorera mu turere 12 tw'u Rwanda. Ni mu gihe ibitaramo by'Ineza Tour byahereye i Kabuga mu mujyi wa Kigali, bikomereza i Nyamata mu karere ka Bugesera, ubu abatahiwe ni ab’i Muhanga na Huye uturere twombi two mu Ntara y’Amajyepfo. 

Ku mugoroba w'uyu wa Kabiri, Apotre Mignonne Kabera yahamagaye Aline Gahongayire kuri telefone ye igendanwa amwemerera inkunga mu buryo bw'amafaranga ndetse anamubwira ko ari kumwe nawe mu buryo bwose. Aline Gahongayire yabwiye Inyarwanda.com ko ibyishimo byamurenze kubera inkunga ikomeye yatewe na Apotre Mignonne. Gusa Gahongayire yirinze kudutangariza umubare w'amafaranga yetewemo inkunga na Apotre Mignonne avuga ko ari ibanga rye na Yesu, ati: "Ni ukuri birandenze,...ni sawa Yesu, arikorera,...ni ibanga ryanjye na Yesu (yavugaga umubare w'amafaranga yahawe na Apotre Mignonne)" Aganira n'umunyamakuru wa Inyarwanda Aline Gahongayire yagize ati:

Gideon, Birandenze, uzi kubona umuntu w'umubyeyi afite inshingano nyinshi afite ibiterane byinshi afite invitations (ubutumire) nyinshi akanyitaho? Akavuga ngo Mwana wanjye uri gukora ikintu kiza, nkore iki? Urumva?, ndagije ndamubwira. Arambaza ngo 'Ese 'Budget' yawe ingana gute'? Ndayimubwira, arambwira ngo 'njyewe ndatanga icya cumi cy'iyo 'Budget mu gushyigikira ababyeyi'. Hanyuma ikindi ikintu gikomeye ndi kumwe nawe. Umva! ntubona ko afite All Women Together (yavugaga Apotre Mignonne), njyewe namaze kuyinjiramo kubera ko kubona amaboko ni ikindi kintu. Ninjiye muri All Women Together yanjye kuko ntabwo ari titre y'igiterane gusa ahubwo ni ibintu bihari. All Women Together ni umugore wumva undi, ni umugore uhagurutsa undi, ni umugore ufasha undi, ni abagore bateraniye hamwe, iyo bateraniye hamwe baba abanyembaraga. So ntabwo rero ari igiterane gusa ahubwo birimo n'ibikorwa. (...) Ineza tour turi mu gikorwa cyo gufasha abana n'ababyeyi batishoboye. Mu babyeyi tuzafasha, arambajije ngo Budget ni iyihe? Ndamubwira, ati 'Mwana wanjye ntugire ikibazo'. No kuba ampamagaye (Apotre Mignonne) akambaza aho bigeze, ni ibintu binshimishije, so ndamushimiye Apotre Mignonne ku bw'amaboko ampaye, nuzuye indirimbo, nuzuye ibikorwa byiza, ndanezerewe.

Gahongayire yiyemeje kuzenguruka u Rwanda avuga ineza y'Imana

Igitaramo Ineza Tour kigiye kubera mu karere ka Muhanga mu gukusanya inkunga yo gufasha no gusanira abatishoboye, Aline Gahongayire azaba ari kumwe n'abahanzi batanu ari bo Elyse, umuraperi MD, Babou, Fredon, Olivier The Legend ndetse na Asaph Muhanga. Si aba gusa ahubwo hari n'abandi baririmbyi banyuranye bazamuherekeza barimo na Rev Kayumba Fraterne. Iki gitaramo giteganyijwe kuba tariki 22 Nyakanga 2018 kuva Saa cyenda z’amanywa kugeza Saa kumi n’ebyiri n’igice z’umugoroba. Kizabera muri Zion Temple ya Muhanga. 

Gatera Joshua, umuhuzabikorwa wa Ineza Tour yabwiye Inyarwanda.com ko ikigamijwe mu Ineza Tour ari igikorwa cyo kugira neza ari nayo mpamvu batishyuza abashaka kwitabira iki gitaramo. Avuga ko amafanga yose ava muri ibi bitaramo bayakoresha mu gufasha abatishoboye, ngo uwakorwaho n’icyo gikorwa cy’’Ineza Tour’ bari gukora akumva nawe yafasha ahawe ikaze.

Aline Gahongayire ubwo yamurikaga album ye nshya 'New Woman'

Mu rugendo rw’ibitaramo ‘Ineza Tour’ ruzagera mu turere 12 tugize u Rwanda, Aline Gahongayire aba yitwaje na album 'New Woman' aho ababishoboye bagura kopi zayo bagatunga indirimbo ze. Hanerekanwa imipira yanditseho ‘Ineza Tour’, ‘Warampishe’… aho umuntu ashobora kuwugura akaba ateye inkunga iki gikorwa.

Iyi Album ‘New Women’ iriho indirimbo nyinshi zihembura imitima ya benshi. Indirimbo nyinshi ziriho zakozwe na Ishimwe Clement Karake wa Kina Music. Uzasangaho indirimbo nka; ‘Warampishe’, ‘Ni yo yabikoze’, ‘Iyabivuze’, ‘Irakora’ ft TMC, ‘I see you’ Ft Serge Iyamuremye, ‘I love it’, ‘Nakumbuka’, ‘Yarahabaye’, ‘Ni nde watubuza’, ‘Awesome God’ na ‘Wandemye remix’.

Album nshya y'indirimbo za Aline Gahongayire

Aline Gahongayire yatangaje ko yamaze kwinjira muri All Women Together, igiterane ngarukamwaka gitegurwa na Women Foundation Ministries iyoborwa na Apotre Mignonne Alice Kabera. Ni igiterane gikomeye gihuriza hamwe abagore baturutse hirya no hino mu gihugu bagahana ubuhamya bw'ibyo Imana yabakoreye, bakayiramburira amaboko. Bafata n'umwanya wo gusengera igihugu n'itorero rya Kristo. Igiterane 'All Women Together' (Abagore Twese Hamwe) cy'uyu mwaka wa 2018 kizaba tariki 15 Kanama-18 Kanama 2018. Cyatumiwemo umuhanzikazi w'icyamamare wo muri Kenya, Mercy Masika ukunzwe cyane mu ndirimbo 'Mwema'

Aline Gahongayire avuga ko yamaze kwinjira mu giterane 'All Women Together' cyatumiwemo Mercy Masika

Igitaramo Aline Gahongayire agiye gukorera mu karere ka Muhanga