Mu rwego rwo gufatanya n’ababyeyi babo umurimo mwiza w’ivugabutumwa batangiye, umuryango w’abana bavuka mu miryango y’ababyeyi b’abapasitori bo muri Anglican mu Rwanda APKF (Anglican Pastors’ Kids Fellowship) bateguye umugoroba wo kuramya no guhimbaza Imana.
Ni igikorwa bateguye babinyujije muri Korali yitwa APKF (Anglican Pastors’ Kids Fellowship choir), akaba ari 'Department' y'uwo muryango. Aba bana bavuga ku bapasitori bo muri Angilikani, bazataramira abanyarwanda mu gitaramo giteganijwe taliki 29 Mata 2018 mu rusengero rw’Abangikani ruherereye i Remera, St Peter Church ahazwi nko mu Giporoso. Ni igitaramo kizaba materaniro ya gatatu (3rd Service), bakaba baragiteguye ku bufatanye na 'St Peter Youth union'. Iki gitaramo kizaba guhera Saa kumi (16:00) kugeza saa moya z'umugoroba (19:00).
Ni impano zihebuje iyi korali iherutse kwegukana umwanya wa mbere mu marushanwa y’amakorali yari yateguwe na KOICA aho batsindiye igihembo cya mbere. Kuri uyu mugoroba w'akataraboneka mu Rwanda (Tariki 29 Mata 2018) bazaba bari kumwe na Altar of Praise Worship Team itsinda ryo kuramya no guhimbaza Imana rikorera i Remera mu Giporoso mu gitaramo kizaririmbirwamo indirimbo zuje ubutumwa bwiza bw’Imana. Umwe mu bayobozi b’uyu muryango Elisha Ruzagiriza avuga kuri iki gitaramo yagize ati:
Nk'uko umukozi w’Imana Pawulo yabivuze mu rwandiko yandikiye Abefeso 2:10, Turi abo Imana yaremye ituremeye imirimo myiza kandi Imana yari yarayiteguye kera ngo tuzayigenderemo. Mu buzima bwacu rero buri muntu agira mission ku isi nk’umukristo, iya mbere Yesu yarayisobanuye ubwo yavugaga ngo mugende hose mubwire abantu bose ko Yesu akiza. Abana bakuriye mu biganza by’abavugabutumwa twatojwe kuvuga ubutumwa bwiza bwa Yesu tukiri bato ku buryo ari nk’umuriro uhora utugurumanamo ntabwo kubyihunza bitworohera. Ikindi bikunzwe kuvugwa ko abana b’abapastori ari ibirari, ibi rero ni nk’umutego satani akoresha ngo agushe benshi mu rubyiruko rwo mu nsengero ruvuga ngo nabo kwa Pasitori barabikora ariko nanone kuko tuba turi inyenyeri yo kwitegererezwaho biroroha ko uwakoze nabi wese agaragara koko ko ari ikirara.
Elisha Ruzagiriza yakomeje agira ati: "Mu rwego rwo kudaha urwaho satani rero twiyemeje no gushaka uburyo twakwikuraho iryo zina ribi dufasha ababyeyi bacu kandi natwe twifasha kugarura abavandimwe bazimiye ndetse tunaharurira barumuna bacu inzira bazacamo ngo babone uko bagaragaza impano zabo kandi bakorera Imana bakiri bato. Kuri uriya munsi rero tubahishiye byinshi mu ndirimbo ndetse n'intangiro z'ibikorwa byinshi APKF Choir yateguye muri uyu mwaka, tuzagenda tubamenyesha. Gusa turahamanya n’Imana yaduhamagaye ko izadukoresha iby’ubutwari bityo izina rya Yesu rikamamazwa mu mahanga yose. Muzaze dufatanyarize hamwe kuzamura ibendera rya Kristo, turatumira abantu bose nta n'umwe uhejwe”.
Abateguye iki giterane bavuga ko bizaba ari umunezero kumva ubutumwa buva mu bana bavukiye mu biganza by'abakozi b’Imana. Bavuga kandi ko bafite byinshi byo gusangiza itorero ry’Imana. Tubibutse ko iki gitaramo kizaba taliki 29 Mata 2018 kikabera mu rusengero rw’Abangikani ruherereye i Remera, St Peter Church ahazwi nko mu Giporoso. Iki gitaramo kizaba guhera Saa kumi (16:00) kugeza saa moya z'umugoroba (19:00).
Korali APKF (Anglican Pastors’ Kids Fellowship) yateguye igitaramo
Eng
RSS 
TANGA IGITECYEREZO