Rutsiro:OMG Dream igiye gushyira hanze filime 'Tuva inda imwe' ishingiye ku nkuru mpamo y'ubuzima bw'impanga zatawe na nyina

Iyi filime ishingiye ku mateka ya nyayo y’abasore babiri b’impanga Nizeyimana Witness na Nizeyimana Jackson bayanditse ndetse bakanayikinamo mu buryo bwo gusangiza abandi bantu ubuzima babayemo nk’uburyo bwiza bwo gutanga isomo ku muryango nyarwanda muri rusange.

Mu gihe akarere ka Rutsiro kadakunze kuvugwa cyane mu myidagaduro bitewe n’imiterere yako nk’uko bitangazwa n’abagatuye, kuri ubu urubyiruko rwo muri aka karere ndetse na Rubavu rwishyize hamwe rukora itsinda ruryita OMG Dream rwiyemeza gutanga ubutumwa binyuze mu mikino y’ikinamico, indirimbo n’ibindi. Magingo aya uru rubyiruko rumaze kurangiza filime yakinywemo n’umukinnyi wamenyekanye cyane mu marira y’urukundo uzwi nka Diarro, se wa Fabiola.

Tuganira n’umuyobozi wa OMG Dream Nizeyimana Witness yadutangarije ko kuva mu mwaka wa 2017 iri tsinda ryashingwa ryakoze byinshi harimo nk’ibitaramo byo kwigisha urubyiruko kwirinda inda zitateguwe, indwara ya SIDA, kwirinda ibiyobyabwenge n’ibindi. Uyu nusore yakomeje kavuga ko kuva OMG Dream yatangira mu kwezi kwa gatanu (Kamena) 2017 bamaze kwesa umuhigo wo kuba bafite abaterankunga babafasha cyane cyane nk’akarere ka Rutsiro n’abandi bantu bikorera muri aka karere.

Mahirwe Eulade wakinnye muri iyi filime yitwa Ngarambe yavuze ko iyi filime irimo ubutumwa bugaragaza ubuzima umuntu ashobora kubamo kuva akivuka kugeza ashaje ikindi kandi ikabamo n’ubutumwa bukangurira abangavu kwirinda inda zitateguwe ndetse no kwirinda ishyari. Yagize ati:

Iyi filime igaragaza neza ubuzima bw'umuntu kuva ari umwana kugeza akuze kandi adacika intege ahubwo akora cyane ndetse bimugeza no ku cyo yifuza. Ikindi kandi bazabonamo udukino dusa na comedi ariko itagamije gusetsa gusa ahubwo igamije kwigisha kudacika intege, comedi ibigisha kwirinda ishyari nk’uko umugabo ngarambe yagerageje kwicisha mugenzi we kuko yamutwaye umwanya mu kazi ariko akaza gusanga nta nyungu irimo akaza kumusaba imbabazi ndetse akagaragaza ko nta nyungu iba mu guhemuka.

Nizeyimana Jackson yavuze ko ku gutumira Diarro byaturutse ku kuba nabo mu rugo rwabo bari bafite umubyeyi w’umusaza ndetse na nyina, gusa ngo akaza kubata bagasigara bonyine nyamara bari bato cyane bigatuma bakura nabi, bityo ngo kuba Diarro akina muri iyi filime nk’umubyeyi wabo ni byo kwishimira cyane kandi bifite isomo rikomeye bitanga by’umwihariko ku bazareba iyi filime bise “TUVA INDA IMWE”.

Witness na Gato bakomeje guteza urujijo mu rugo kwa Matyhias mu gihe Ngarambe n’abasore be bakomeje imigambi yabo mibisha. Ese Joyeuse azageraho amenye umuhungu we. Biteganijwe ko iyi filime “Tuva inda imwe“ izerekanwa mu karere ka Rutsiro ari naho yakiniwe ndetse ifite n’amateka akomeye cyane by’umwihariko kuri Nizeyimana Witness na Nizeyimana Jackson.