Young Grace wizihiza isabukuru y'imyaka 25 yabwiwe amagambo yuje urukundo n'umukunzi we

Kuri uyu munsi w'amavuko ye Young Grace yagenewe impano y'amagambo y'urukundo n'umukunzi we aho uyu musore yibukije uyu muhanzikazi ko muby'ukuri ari umwe mubatuma abaho yishimye, aha uyu musore akaba yagize ati"Isabukuru nziza ku muntu mwiza/utangaje kurusha abandi mu buzima bwanjye, Young Grace, utuma numva ndi umunyamahirwe cyane mu rukundo. Nakwifuje gufatisha umutima wanjye kuri ubu butumwa bukwifuriza isabukuru nziza, niko agaciro kawe kangana kuri njye. Ndakwifuriza guhora wishimye kandi nzakora icyo bisaba cyose ngo ngushimishe kandi wumve umerewe neza mu rukundo. Isabukuru nziza mukunzi, ishimire umunsi wawe."

Amagambo Young Grace yabwiwe n'umukunzi we

Muri Kamena uyu mwaka wa 2018 nibwo byamenyekanye mu itangazamakuru ko Young Grace asigaye afite umukunzi mushya witwa Uwishimwe Pacifique wamamaye nka Pique, aha mu kiganiro bahaye Inyarwanda.com bakaba aribo bihamirije ko muby'ukuri bakundana ndetse amakuru yageraga ku Inyarwanda agahamya ko aba bombi bamaze igihe kitari gito bakundana nubwo bari batarabishyira ku mugaragaro.

Igihe yahamirizaga umunyamakuru ko akundana n'uyu musore Young Grace yahamirije Inyarwanda.com ko uyu musore amukunda ku buryo iyo amubona imbere ye igihe ari ku rubyiniro aba yumva ameze neza. Young Grace yabwiye umunyamakuru ko mu byo akundira uyu musore ari uko ari mwiza ndetse akaba agira n'umutima mwiza. Ibi bidahabanye ni byo uyu musore akundira Young Grace dore ko yabwiye umunyamakuru ko akundira Young Grace umutima mwiza agira ndetse no kuba amukunda.

Young Grace n'umukunzi we Pique

Amakuru agera ku Inyarwanda ni uko uyu musore uzwi nka Pique yari asanzwe ari umukinnyi w'umupira w'amaguru mu ikipe ya Heroes ikina icyiciro cya kabiri hano mu Rwanda icyakora ariko ubu akaba ari umwe mu bakinnyi bashobora kuzifashishwa n'ikipe ya Bugesera Fc aho amaze iminsi akorera imyitozo nyuma y'igihe kinini afite imvune adakina umupira w'amaguru.