Mu minsi ishize hamenyekanye inkuru mbi ko papa w'umuhanzikazi Sheebah Karungi yitabye Imana,gusa abenshi bakaba baratunguwe no kubona umukobwa we ariwe Sheebah ataritabiriye imihango yo gushyingura umubyeyi we. Shebah yatangaje impamvu atagaragaye mu gushyingura papa we ndetse anashimangira ko nta kosa na rimwe afite byose ari amakosa ya se.
Urupfu rwa Hamada Musoke papa wa Sheebah rwaje rukurikirana n'urwa Radio. Icyatangaje abantu benshi ndetse ntikinavugweho rumwe ni ukuba Sheebah Karungi atarigeze yitabira umuhango wo gushyingura se umubyara gusa nyuma y'iminsi igera kuri itanu uyu mubyeyi Hamada Musoke yitabye Imana, umukobwa we Sheebah Karungi yatangaje impamvu zabiteye.
Hamada Musoke mbere y'uko yitaba Imana yari yaratanze itegeko ko umukobwa we Sheebah atagomba kuzemererwa kumubona ndetse ko atanakwiye kuzagera ku mva ye mu gushyingurwa kwe. Yakomeje avuma uyu mukobwa ndetse anategeka umuryango wose kutazigera hagira uwifatanya na Sheebah mu bikorwa bye ibyo ari byo byose yaba ariho cyangwa atakiriho.
Sheebah Karungi yasobanuye impamvu atagiye gushyingura papa we
Mu butumwa bwuzuye agahinda no kurenganya cyane papa umubyara, Sheebah abinyujije ku rukuta rwe rwa Facebook yagaragaje impamvu zamuteye kutajya gushyingura se anavuga ko atigeze amuba hafi ngo amwereke urukundo kuva mu bwana bwe kugeza akuze. Muri ubwo butumwa kandi, Sheebah ntabwira se umubyara gusa ahubwo abwira muri rusange ababyeyi b'abagabo bose batita ku bana babo ngo babahe urukundo bakiri bato, akanabibutsa ko hari igihe gishobora kugera bakicuza ahahise bitagishobotse ko bahagarura by'umwihariko Amasabukurun'ibiruhuko batishimana hamwen'abana babo bakiri bato.
Mu gusoza ubutumwa bwe kandi Sheebah avuga ko nta kosa na rimwe rigomba kumushyirwaho cyane ko yari umwana muto atari afite icyo gukora cyangwa se kuvuga ku byo yabonaga biri kumubaho, ahubwo papa we yagombaga kwirengera ingaruka za byose cyane ko ari ibikorwa bye bwite. N'ubwo yarakariye cyane se umubyara ariko, Sheebah ababarira cyane nyina umubyara ndetse akanahamya ko yamubaye hafi muri byose akanamufasha uko ashoboye. Bityo abona nta muntu n'umwe ufite uburenganzira bwo gucira mama we urubanza rwamumanikisha.
Uko ubutumwa bwe bwari bumeze tugenekereje mu Kinyarwanda "Umunsi umwe uzaba uri wenyine maze wicuze kuba adahari.Uzicuza amasabukuru n'ibiruhuko utagaragayemo.Uzicuza kuba utaramubonye akura uri mu buzima bwe.Uzicuza buri kintu cyose wakoze kandi icyo gihe bizaba byaratinze cyane...Kandi NTIBIZIGERA BIBAA ikosa rye kuko yari umwana. Ntiyigeze ahitamo ipfunwe"
Eng
RSS 
TANGA IGITECYEREZO