Bobi Wine yaburiwe irengero, umugore we ati ''Turi mu gihirahiro''

Abinyujije kuri Facebook, umugore wa Bobi Wine, Barbara Kyagulanyi Itungo uzwi nka Barbie, yavuze ko atazi irengero ry’umugabo we wari kumwe n’abandi bantu barindwi, ndetse ngo nta telephone umugabo we akoresha ntiri gucamo. Yagize ati:

Inshuti n’imiryango, turi mu gihirahiro kuva mu ijoro ryacyeye. Nk’uko mwese mubizi, umushoferi wacu yarasiwe ahitwa Arua. Ni umunsi w’akababaro kuri twe. Ntabwo nzi aho umugabo wanjye n’abandi bantu barindwi bari kumwe baherereye ubu, twababuze bose. Abo bose ntabwo telephone zabo ziri ku murongo, turi kurebera mu madirishya n’ahandi dutegereje amakuru mashya yatugereho.

Daily Monitor iravuga ko Bobi Wine yaburiwe irengero nyuma yo kwandika kuri Twitter, mu ijoro ryakeye avuga ko Polisi ya Uganda yarashe umushoferi we baziko ariwe. Ni mu gihe Ugbliz, yo ivuga ko Bobi Wine afungiye ahantu umuryango we utazi, ngo yatwawe n'abashinzwe umutekano bamujyana ahantu hatazwi kugeza ubu.