Platini yabyinishije inkumi biratinda mu gitaramo Dream Boys bakoreye muri Ambassador’s Park-AMAFOTO

Nk’ibisanzwe muri Ambassador’s Park ibyaho bihora ari bishya. Nta munsi n'ijoro hataba ibirori. Kuri uyu wa Gatanu tariki 18 Gicurasi 2018 mu gitaramo cyiswe WEYOTAP (Weekly Youth Talent Performance), itsinda rya Dream Boys ni ryo ryari ryatahiwe nyuma y’uko mu byumweru byatambutse hataramiye abandi bahanzi bakomeye barimo King James, Natyy Dread n’abandi benshi bagiye banyura ababa bahateraniriye.

Itsinda rya Dream Boys rigizwe na Platini ndetse na TMC bageze ku rubyiniro mu gicuku, babanje kuririmba umuziki w’umwimerere (Live) nyuma bavangamo na Play Back. Bikirijwe mu ndirimbo zose bateraga, yaba izo bakoze mu myaka yatambutse n’izo baheruka gushyira hanze mu minsi ya vuba nka 'Wagiye Kare' imaze kwigarurira imitima ya benshi.

Uyu mukobwa yatunguwe no kubona Platini amusanga ku rubyiniro amusaba ko babyinana

Igitaramo kigeze hagati Platini yakoresheje irushanwa, abwira abari aho ko hari umuntu ashaka kugurira inzoga, bose bateye hejuru bavuga ko bashaka y’uko abagurira. Yahise asaba abiteguye kunywa kuri iyo nzoga kumusanga ku rubyiniro. Hageze batanu, ababwiye ko bagiye kuririmba indirimbo buri wese akunda ya Dream Boys, hasigaye babiri gusa [umukobwa n’umuhungu].

Umukobwa yaririmbye indirimbo nshya ya Dream Boys bise 'Wagiye Kare', umusore nawe aririmba indi. Birangira uyu musore ari we utsinze ahabwa ibihumbi (5000Rwf) byo kugura ikaziye ya Primus ariko Platini yamusabye ko yasangira n’uwo mukobwa.

Uyu musore yasanze Dream Boys ku rubyiniro, ibintu bihindura isura barabyina biratinda

Platini yageze aho ava ku rubyiniro asanga umwe mu bakobwa wari wafi y’urubyiniro ubundi batangira kubyina biratinda, ibintu byashimishije abari aho. Uyu mukobwa ariko yari yabanje gutinya yangira Platini ko babyinana, nyuma yakubise agatwenge Platini akimurekura akamusiga mu byicaro undi nawe akomeza gushimisha abakunzi b’iri tsinda.

Igitaramo cyasojwe hari benshi bakinyotewe n’umuziki w’aba basore. Bamwe mu bafana ba Dream Boys’ Indatwa’ nabo bari bahabaye, babyinnye indirimbo z’aba basore kuva batangiye, baranzika kugeza bageze ku musozo bashimira abafana uburyo babanye n’abo.

Mu kiganiro na Inyarwanda, Platini yavuze ko yanyunzwe n’ubwitabire babonye muri Ambassador’s Park, avuga ko bafite byinshi bahishiye abakunzi babo bagiye gushyira hanze mu minsi ya vuba, yizeye ko bizanyura abakunzi babo bari mu nguni zose. Amakuru Inyarwanda.com ikesha ubuyobozi bwa Ambassador's Park ni uko kuwa Gatanu utaha mu gitaramo WEYOTAP, Jules Sentore ari we uzasusurutsa abazasohokera muri Ambassador's Park.

Ambassador's Park iherereye i Gikondo mu mujyi wa Kigali. Iteganye n'urusengero rwa Methodiste Libre. Usibye kuba wahasohokera ugafata kamwe bijyanye n'amahitamo ya buri wese, ubusanzwe Ambassador's Park itanga serivisi zinyuranye zirimo Sauna&Massage, amafunguro ya kumanywa n'ibindi. Bafite kandi n'amacumbi meza cyane ku biciro byoroheye buri wese. Iyo wahasohokeye kandi ubasha gukoresha interineti y'ubuntu.

AMAFOTO:

AMAFOTO: Janvier Iyamuremye-Inyarwanda.com