Nyuma y’amakuru atandukanye yagiye avugwa kuri Miss Sandra Teta arimo n’ajyanye n’umwenda watumye anafungwa, mu mpera z’iki cyumweru byavugwaga cyane ko yatorokeye muri Uganda kubera imyenda, ariko kugeza ubu ashimangira ko yanagarutse mu Rwanda kandi ibivugwa bikaba nta shingiro bifite.
Tariki 22 Nyakanga 2015, nibwo Miss Sandra Teta yatawe muri yombi na Polisi y’u Rwanda azira guha umunyemari Nkusi Godfrey sheki itazimagiwe y’amafaranga y’u Rwanda arenga miliyoni enye yari amurimo, hanyuma aza gufungurwa tariki 27 Nyakanga 2015 nyuma y’ubwumvikane bw’impande zombi.
Nyuma y’uko afunguwe byagiye bivugwa ko hari n’abandi abereyemo imyenda biyongera kuri uyu mucuruzi Nkusi Godfrey yari atararangiza kwishyura n’ubwo bari bumvikanye. Muri iki cyumweru dusoje, Miss Sandra yagiye mu gihugu cya Uganda maze amakuru atangira guhwihwiswa ko yaba yaragiye atorotse kubera imyenda abereyemo abantu batandukanye barimo uyu Nkusi Godfrey, abanyamideli bamufashije mu birori aheruka gukorera i Nyarutarama ndetse n’abarinda umutekano mu birori (bouncers) bamufashije muri ibyo birori.
Miss Sandra Teta ahamya ko yari yaragiye muri Uganda ariko bikaba ntaho bihuriye no gutoroka kubera imyenda
Mu kiganiro na Inyarwanda.com, Miss Sandra Teta yahamije ko atatorotse ndetse ubu akaba yamaze kugera mu mujyi wa Kigali avuye i Kampala aho yari yagiye, muri Uganda akaba yari yagiyeyo mu myiteguro y’ibirori arimo guteganya kuhakorera mu minsi iri imbere. Yashimangiye ko nta mpamvu n’imwe yatuma atoroka, kandi ko n’uwatoroka atatorokera mu gihugu cya Uganda, ngo ajye anakomeza kuvugana n’abo bavuga ko yatorotse.
Miss Sandra ati: “Njye nta mpamvu n’imwe yatuma ntoroka. Aba bouncers narabishyuye nta mafaranga mbarimo, Nkusi Godfrey nawe namaze kumwishyura. Hanyuma aba models bo nta masezerano twari dufitanye mbere yo gukorana, twari twavuganye ko tuzavugana nyuma y’igitaramo binatewe n’uko cyagombaga kuba cyagenze. Nyuma nabanje kwishyura abari baturutse hanze, abandi nabo nakabaye narabishyuye ariko inkuru yakozwe imparabika yatumye ntakaza contracts nyinshi, gusa si amafaranga menshi yatuma ntoroka, ibihumbi 400 byatuma utoroka? N’iyo zaba ari miliyoni icumi aho gutoroka nakora nkayashaka, kuko gutoroka siko kuyishyura. Gusa mbabazwa no kumva n’abo nishyuye bagenda bavuga ngo mbarimo imyenda…”
Miss Sandra Teta avuga ko ibyo ashyize imbere ubu ari ugukora cyane kandi akaba yizeye ko nta muntu azambura cyane ko nta mwenda w'amafaranga menshi afite, ubu akaba ari mu myiteguro y’ibirori azakorera muri Uganda bizaba bimeze nk’ibyo aheruka gukorera mu Rwanda by’abambaye imyenda itukura.
Eng
RSS 
TANGA IGITECYEREZO