Ntabwo nkiri umuririmbyi w’urusengero - Patrick Nyamitari

Patrick Nyamitari wamenyekanye cyane mu ndirimbo zihimbaza Imana nka “Ni we Mesiya”, “Iyo Mana” n’izindi n’ubwo ahamya ko ari umukristo, avuga ko atakiri umuhanzi w’idini cyangwa w’urusengero ahubwo akaba yaramaze ngo kwisobanukirwa agasanga ari umuhanzi wagutse kurusha kuba yakora Gospel gusa. Nyuma yo kwisobanukirwa no gufata umwanzuro wo kuva muri Gospel, ngo yabibonyemo inyungu nyinshi.

Mu kiganiro na Ten To Night kuri uyu wa 4 Ukwakira 2015, Patrick Nyamitari yavuze ko kuva ahagaritse gukora umuziki wa Gospel gusa, kugeza ubu ngo hari inyungu nyinshi amaze kubona. Inyungu iruta izindi mu zo ari kubonera mu muziki usanzwe, ngo ni ukuba abona abantu benshi cyane barabashije kwibona mu bihangano bye kubera uburyo bibafasha cyane. Yatangiye avuga ko atakiririmba Gospel ahubwo ko yaguye(kwagura) umuziki we. Yagize ati:

Ntabwo ndi umuririmbyi w’urusengero ariko mbere niko byari bimeze, nyuma naje kwisobanukirwa nsanga ndi umuhanzi wagutse urenze n’abo bose(abakora Gospel). Kuririmbira Imana, umuhanzi wese wemera Imana aba akwiye kuyiririmbira igihe cyose agize inspiration(afite ubutumwa yatambutsa), ntabwo bisaba ko ugomba kuba uri umuhanzi w’urusengero.

Patrick Nyamitari yamaze kwisobanukirwa agasanga ari umuhanzi urenze abaririmba Gospel

Patrick Nyamitari kuri ubu uru gukora cyane indirimbo zivuga ku rukundo, ubumwe bw’abanyarwanda n’ubwiyunge bw’abanyarwanda, yatangaje ko ikintu cyamunejeje kurusha ibindi ari ukuba yarungutse abafana benshi bashimishwa cyane n’ibihangano bye kandi bakagenda babimugaragariza. Yagize ati:

Inyungu ya mbere yanjye mbere y’ibindi byose ni ukubona hariho umuntu ukorwaho n’indirimbo ndirimbye yaba iy’urukundo, yaba iy’ubumwe n’ubwiyunge by’abanyarwanda, nkabona n’undi wakorwaho ku mutima bijyanye n’imibanire yacu n’Imana. Njyewe ikintu cyanejeje, inyungu ya mbere iruta izindi kuko izindi ntabwo ndibuzigemo,ni uko mbona abantu benshi kurushaho, barabashije kwibona mu bihangano byanjye kandi ngenda mpura nabo, ugasanga umuntu arambwiye ko indirimbo yanjye yamuhaye indi image(ishusho) y’urukundo.

Nyamitari Patrick ashimishwa no kuba afite abakunzi benshi cyane

Nyuma yo kuva muri Gospel n’ubwo atajya abyemera kuko avuga ko umuntu wese wemera Imana aba afite uburenganzira bwo kuririmba Gospel, kugeza ubu Patrick Nyamitari amaze gukora indirimbo zisanzwe zitandukanye zirimo: Nyirakidederi, Rangwida,Nguhobere n’izindi ukongeraho n’indi nshya yamaze gushyira hanze yitwa Umulisa.

Abajijwe impamvu atari gukora cyane nk’uko yakoraga mbere akiba muri Gospel, Nyamitari yavuze ko ubuhanzi abufatanya n’akandi kazi akora gusa ngo nta kibazo na kimwe kindi afite. Yaje kongeraho ko nawe atajya abona amahoro iyo amaze igihe kirekire nta gihangano gishya akoze kuko nawe aba yumva ngo bimubangamiye kimwe nk’uko biba bibangamiye abakunzi be b’ibihangano bye.

Patrick Nyamitari (iburyo)mu ndirimbo Rangwida

REBA HANO INDIRIMBO RANGWIDA YA PATRICK NYAMITARI