Peter Okoye yahishuye ibizazane yanyuranyemo n’umugore we bamaranye imyaka 5 wavuzweho kutishimirwa na Nyirabukwe

Mu butumwa bw’inkurikirane Peter Okoye ari we Mr P yanyujije kuri Instagram, yatangaje ko uyu munsi udasanzwe mu buzima bwe kuko ari bwo yafashe icyemezo cyo kurushingana n’inshuti magara. Yagize ati “Uyu munsi, ni umunsi nafatiyeho icyemezo cyo gushyingiranwa n’inshuti yanjye….Ndishimye, ntabwo nicuza kuba narashakanye nawe, uwo nishimira guseka nawe, inzozi zanjye n’urukundo rwanjye,”

Yavuze ko hari benshi batazi igisobanuro cy’uyu mugore mu buzima bwe, ngo hari abamwijujitiye bamuha urw'amenyo, bakavuga y’uko akuze, ndetse ngo hari n’abavuze ko atishimiwe na Nyirabukwe. Ati “Benshi ntibazi icyo uvuze mu buzima bwanjye. Nabonye benshi bagututse, bakwita amazina atandukanye…Bakavuga ngo urakuze n’ibindi byinshi ntashaka kuvuga.. Erega baje no kuvuga ko Nyakwigendera Mama atagukundaga ariko Imana ni yo izi neza ko mbere y’uko apfa ari wowe wamubaye iruhande mu bitaro bya Nicolas Hospital.”

Mr P yavuze ko umugore we yatutswe akabyihanganira.

Yavuze ko gutandukana n’umugore we, hari benshi byari gushimisha ariko ngo si cyo cyerekezo. Yakomeje avuga ko mbere y’uko arushingana n’umukunzi we bari bamaranye imyaka 16 baziranye, ubu barizihiza imyaka itanu bahuje urugwiro rwashibutsemo urukundo ruryoshye. Yagize ati “Twari kumwe mu myaka 16, none imyaka itanu irashize dukoze ubukwe. Uracyari wa mugore kandi sinzigera nibagirwa umunsi nahuraga nawe bwa mbere,..”

Yahishuye ko akiri kumwe n’impanga ye, uyu mugore yagize uruhare rukomeye mu kubashakira ibiraka n’ibindi byabinjirizaga amafaranga, ngo uburwaneza bwe yanabwumvanye uwahoze ari umujyanama wabo. Yagize ati “Ndibuka neza ukuntu uwahoze ari umujyanama wacu, Howie-T yakundaga kutubwira ukuntu uri umuntu mwiza udushakira akazi n’ibindi byose. Uyu munsi Isi ntabwo izi ibyo byose,”

Ahubwo bakwita umukuzi w’amenyo. Niba hari umuntu wakitwa umukuzi w’amenyo hano, agomba kuba ari njye, kuko ndibuka ukuntu wampaye imodoka yawe bwite nyuma y’ibyumweru bike tukajya i Lagos tugatangira gukundana.

Bwari ubwa mbere mu buzima bwanjye ngize imodoka irimo icyuma gisohora ubukonje. Amajoro menshi nakundaga gusinzirira muri iyo modoka. Wangize mwiza Lola(umugore we), ndumva nta kindi nkugomba uretse urukundo n’ubumuntu. Reka nsoreze aha kubera ko ari isabukuru y’ubukwe bwacu. Nta mpamvu yo kuvuga ibintu byinshi. Isabukuru nziza kuri twe.”

Yavuze ko we n’umugore we bakwiye gushima Imana igikomeje kubatiza impagarike n’ubugingo. Yashimye kandi umugore we wamubyariye, avuga ko ari impano iruta izindi atunze. Yavuze ko uyu mugore we yabaye intwari kuko yirengagije ibyavuzwe byose agashikama ku rukundo rwe n’umugabo we.

Ku wa Gatandatu tariki 17 Ugushingo 2013 ni bwo Mr P yarushinganye n’umukunzi we mu birori biryoheye ijisho byabereye Ark Event Cent i Lekki mu mujyi wa Lagos muri Nigeria. Uyu muhanzi yakoze ubukwe n’umukunzi we, Ola Omotayo, bwitabiriwe n’umukinnyi Emamnuel Adebayor n’ibindi byamamare, bwakozwe mu muco Gakondo wa Nigeria.

Yavuze ko uyu mugore bagiye kurushinga bamaranye imyaka 16 baziranyi.

Imyaka itanu irashize bombi barushinze.