Mu gihe habura amezi abiri gusa ngo umunsi mukuru wa Noheli ugere, umuhanzi King James yateguriye abakunzi be impano ijyanye n’uwo munsi, akaba kugeza ubu arimo gushaka aho azapfundurira agaseke hagati y’i Kigali no mu mujyi wa Rubavu kuko byanze bikunze agomba guhitamo hamwe muri aho hantu habiri.
Iyi mpano ya King James, ni album ye izaba yitwa “Ntibisanzwe”, iri zina rikaba rinajyanye n’indirimbo ye nshya yitiriye iyi Album, iyi ikazaba iriho indirimbo ze zitandukanye zagiye zikundwa cyane harimo nka Yanyumye, Yaciye ibintu, Narihannye, Zizane tuzinywe, iyi nshya yitwa “Ntibisanzwe” ndetse n’izindi abazitabira igitaramo cye bazabasha kumenya ku munsi nyirizina wo kumurika album.
KANDA HANO WUMVE INDIRIMBO "NTIBISANZWE"
Nk’uko King James yabitangaje mu kiganiro na Inyarwanda.com, iyi ndirimbo yashyize ahagaragara yitwa “Ntibisanzwe” ari nayo izitirirwa album niyo ya nyuma azatangaza mbere yo kumurika album kuko n’ubwo izindi zose zarangiye gutunganywa azazimurikira abakunzi be ku munsi nyirizina wa Noheli isanzwe yizihizwa tariki 25 Ukuboza.
Kuri iyi album, King James azabona umwanya wo gushimira abakunzi be no kwishimana nabo ku byo bagezeho muri uyu mwaka wose uzaba ugeze ku musozo, mu minsi micye akaba azafata umwanzuro hagati ya Kigali na Rubavu aho azakorera iki gitaramo gikomeye akageza ku bakunzi be impano y’umwaka.
Manirakiza Théogène
Eng
RSS 
TANGA IGITECYEREZO