Rurangiranwa mu muziki wa Leta zunze ubumwe za Amerika akaba n’Umukinnyi wa filime Katheryn Elizabeth Hudson Katty Petty, yahigitse bagenzi be yegukana umwanya wa mbere ku rutonde rw’Abagore icumi ba mbere binjije agatubutse mu muziki muri uyu mwaka wa 2018. Yarushije bikomeye abarimo Beyonce, Taylor Swift n’abandi.
Katy Perry wakoze indirimbo ‘Roar’ igakundwa by’ikirenga ayoboye uru rutonde rw’abagore icumi na madorali miliyoni 83 ukuyemo imisoro mu gihe cy’amezi 12 nk’uko Forbes, ikinyamakuru kizobereye mu gukora intonde z’Abanyamafaranga kibitangaza.
Uyu muhanzikazi wavutse kuya 24 Ukwakira, 2018 aciye agahigo nyuma y’iminsi 80 amaze akora ibitaramo bizenguruka Isi yise ‘Witness’. Amafaranga yasaruyemo nayo yagize uruhare rukomeye mu kumwicaza ku mwanya wa mbere mu bahanzikazi binjije menshi muri uyu mwaka wa 2018. Uretse aya amafaranga yakuye mu bitaramo, uyu muhanzikazi ubutunzi bwe bwaniyongereye biturutse ku kayabo k’amafaranga kagera ku madorali miliyoni 20 yahembwe mu kanama nkemurampaka k’irushanwa ‘America Idol’.
Umusaruro mbumbe w’amafaranga ye kimwe n’abandi bahanzikazi yabazwe kuva kuya 01 Kamena, 2017 kugeza kuya 01 Kamena, 2018; hakuwemo amafaranga bahaye abashinzwe kubashakira ibiraka, abajyanama be, abanyamategeko, ubukode n’ibindi.
Katty Perry ayoboye urutonde rw'abagore icumi binjije agatubutse mu muziki muri 2018./Ifoto: StubHub
Ku mwanya wa kabiri hari umuhanzikazi Taylor Swift winjije agera ku madorali miliyoni 80 mu mwaka wose abicyesha alubumu ye yacurujwe cyane yise ‘Reputation’. Yagurishije kopi zigera kuri miliyoni ebyiri mu cyumweru kimwe gusa iyi alubumu isohotse. Indirimbo ye ‘Blank Space’ yakunzwe cyane nayo yamufashije gusarura menshi mu bitaramo yagiye akorera muri sitade.
Forbers ivuga ko hari amahirwe menshi y’uko Taylor muri 2019 ashobora kuza ku mwanya wa mbere nyuma y’uko mu cyumweru gishize agiranye amasezerano na Universal Music Group. Yari amaze igihe kinini afitanye amasezeramo na Big Machine.
Muri 2016 Taylor Swift niwe wari ku mwanya wa mbere aho yari yinjije miliyoni 170 z’amadolari. Muri 2017 Beyonce Knowles niwe wari ku mwanya wa mbere n’ amadolari miliyoni 105.
Taylor Swift ari ku mwanya wa kabiri.
Abagore icumi ba mbere binjije akayabo muri 2018 bakuye mu muziki:
1. Katy Perry ($83 million)
2. Taylor Swift ($80 million)
3. Beyoncé ($60 million)
4. Pink ($52 million)
5. Lady Gaga ($50 million)
6. Jennifer Lopez ($47 million)
7. Rihanna ($37.5 million)
8. Helene Fischer ($32 million)
9. Celine Dion ($31 million)
10. Britney Spears ($30 million)
Eng
RSS 
TANGA IGITECYEREZO