IGITEKEREZO: 'Safi ntakwiye guterwa ubwoba n'ibivugwa kuri Niyonizera Judith basezeranye?'

Iki cyumweru, ntawashidikanya ko inkuru y'ubutumwa bwoherejwe na Rick Hilton, yabaye 'ikimenamutwe' kuri Judith Niyonizera na Niyibikora Safi 'Madiba. Aba bombi bari bakibereye mu kwezi kwa buki nyuma yo gusezerana imbere y'amategeko tariki 1 Ukwakira. Kidobya y'ibyishimo yabaye ubutumwa bwa Rick Hilton wakanze rimwe gusa (just a click) maze ubutumwa bwa email bugakwirakwira ku banyamakuru ba hano mu Rwanda, we yibereye muri Canada. Niko bigenda ubusanzwe iyo wabaye icyamamare cyangwa uri inshuti n'icyamamare kuko mu kanya nk'ako guhumbya, ku mbugankoranyambaga hari hakwirakwiye amafoto ya 'Judith' arimo n'agaragaza ubwambure bwe. Uko niko abantu bari bacitse ururondogoro bavuga bati ariko se ubundi ibyo uyu muzungu 'Hilton' avuga twabyemezwa n'iki? Abandi bati ariko se kuba nyamukobwa yaratandukanye n'uyu 'musaza' ni ngombwa ko amwandagaza bene aka kageni? Impaka zabaga ari ndende ku mbuga nkoranyambaga kuko hari n'abatariyumvishaka impamvu Hilton avuga ko yambuwe na Judith akayabo k'amadorari yarangiza akanduruka akiyizira mu Rwanda gukora ubukwe na Safi Madiba. Hari abo agatima kakomaga kubyo Muzehe Hilton avuga byo kuba afite amakuru yo kuba Judith ibyo kurya agafaranga abasaza yari abimeyereye iyo muri Canada kuko ngo hari n'abandi bazungu babiri yabikoze bagatandukana. Iki gice, nicyo kidahisha ko niba ari byo koko, Judith yaba yarahemutse kurya agafaranga ku muntu amubeshya urukundo kuko byaba ari ubwambuzi.

'Yudita' yararuciye ararumira!'

Kuva uruhererekane rw'ibyavugwaga kuri 'Judith' rwatangira, nta munyamakuru yigeze avugisha ngo agaragaze niba ibimuvugwaho ari ukuri cyangwa niba ari ikinyoma kigamije kumuharabika. Umufasha we Safi, yabwiye Inyarwanda.com ko . Rick Hilton, nawe yabaye nk'ugira inkomanga asaba imbabazi ababonye amafoto ya 'Yudita' n'abababajwe n'ibyo yamutangajeho. Tariki 17 Ukwakira, 2017, Rick yatangarije Inyarwanda.Com ko ibyo yakoze yabitewe n'agahinda no kuba yari yananiwe kwakira ibyari byamubayeho kuko yari yarihebeye 'Yudita' waje kumuhinduka akabenguka Safi nyamara ngo bari bamaranye imyaka ibiri bakundana banapanga ubukwe.

'Safi Madiba, ibyabaye bimubwiye iki?'

Ibyacicikanaga ku mbugankoranyambaga, byafashwe na bamwe nk'ibishobora kurangira na Safi bimugizeho ingaruka nk'umuntu wasezeranye na 'Yudita' uvugwaho kuba yarariye amafaranga ya Rick ndetse bikanavugwa ko yaba hari abandi bazungu batandukanye igihe yabaga muri Canada. Ntawakwemeza neza niba Safi yarigeze amenya iby'uyu mufasha we ariko kuba bari bafitanye umushinga wo kujya kuba muri Canada, hari abibaza niba nta cyahindutse. Ejo ku wa kabiri tariki 17 Ukwakira, 2017, Safi yemereye Inyarwanda.Com ko Rick yavuganye na Judith akamusaba imbabazi zo kuba yarashyize hanze amabanga yabo ndetse ngo ibibazo byari byarangiye. Ariko se, ibyavuzwe kuri Judith, nta mpungenge biteye Safi? Niba bari bafite gahunda yo kujya kubana muri Canada, ubu uyu mugambi ntiwapfubye? Nyir'ubwite ariwe Safi, ntiyifuza kugira icyo abivugaho kuko inshuro zose twagerageje telephone ye igendanwa, icamo ariko ntiyitabe. Tubitege amaso!