Iby’umunyarwenya wahimbye imbyino za ‘In My Feelings’ zabiciye bigacika kuri interineti

Niba ukoresha cyane imbuga nkoranyambaga cyangwa ukaba ukurikiranira hafi imyidagaduro yo muri Amerika, imbyino za ‘In My Feelings’ waba warazibonye zigeragezwa na benshi ndetse harimo n’abasitari bakomeye batandukanye. Bamwe muri bo ni nka Ciara, Lala, Will Smith n’abandi benshi.

Iyi mbyino ya Shiggy yayikoze ku itariki 30/06/2018, ni nyuma y’umunsi umwe gusa Drake ashyize hanze ‘Scorpion’ akaba yarayihaye hash tag ya #DoTheShiggy ari nayo yagiye ikoreshwa n’abasubiragamo iyi mbyino kugeza ubu ikaba imaze gukoreshwa n’abarenga ibihumbi 100.

Aya niyo mashusho y'umwimerere Shiggy abyina In My Feelings bwa mbere

Naho Hash tag ya #InMyFeelings yo ikaba imaze gukoreshwa n’abarenga ibihumbi 400. Aha ntitwabariyemo amamiliyoni y’abantu yagiye areba amashusho ku mbuga nkoranyambaga y’iyi mbyino, urugero nka Ciara yarebwe n’abarenga miliyoni 10, Shiggy ku giti cye yarebwe n’abarenga miliyoni 6, ni mu gihe Will Smith yarebwe n’abarenga miliyoni 18.

Nyuma y’uko iyi mbyino yamamaye cyane, Drake yaje guhura na Shiggy ndetse anahamya ko kuba iyi ndirimbo iri ku mwanya wa mbere kuri Billboard abikesha uyu musore w’umunyarwenya. Nyuma y’ibyo ariko Drake yituye uyu musore kujya mu mashusho y’iyi ndirimbo, dore ko izi mbyino Shiggy yazadukanye Drake atarakora amashusho y’indirimbo ye.

Shiggy yahembwe kujya mu mashusho ya 'In My Feelings'

Shiggy asanzwe ari umunyarwenya ndetse niwe watangije The Shiggy Show aho atera urwenya akenshi yifashishije imbyino cyangwa amashusho amugaragaza ari kuvuga. Uyu musore w’imyaka 25 afite abamukurikira barenga miliyoni kuri Instagram.

Izi mbyino zaje kugenda zihindurwaq cyane ku buryo abenshi babyinaga basohotse mu mudoka iri kugenda ndetse bikaba byaragiye biteza impanuka. nyuma y'izi mpanuka Shiggy yasabye abantu kwirinda mu gihe bagerageza gukora izi mbyino basohotse mu mudoka cyane cyane iri kugenda.

Kanda hano urebe amashusho ya 'In My Feelings'