Huye-‘Ineza Tour’: Diana Kamugisha ku rutonde rw’abaramyi 10 b’amazina akomeye bazaherekeza Gahongayire

Iki gitaramo kigiye kubera i Huye cyabimburiwe n’ibindi bitaramo bikomeye byagiye bihesha benshi umugisha , bibera mu turere dutandukanye. ‘Ineza Tour’ yabanjirije i Kabuga mu mujyi wa Kigali, ikomereza i Nyamata mu Karere ka Bugesera, i Muhanga abatahiwe n’ab’i Huye mu Ntara y’Amajyepfo.

Tariki ya 29 Nyakanga 2018 ni bwo iki gitaramo cyo kuramya no guhimbaza Imana giteganijwe kuba. Cyatumiwemo abahanzi b’amazina azwi: Elyse ubarizwa muri Gisubizo Ministries, Diana Kamugisha, The Pink, Pastor Diana, Janvier Muhoza, MD, Babou, Freddy Don, Olivier The Legend ndetse na C.Patrick.

Gahongayire yatumiye abaramyi icumi

Dj Spinn niwe uzavangavanga umuziki wo kuramya no guhimbaza Imana muri iki gitaramo mu gihe Light Band ariyo izacurangira umuhanzikazi Aline Gahongayire, aba bakaba aribo batangiranye uru rugendo rw’ibitaramo ruzagera mu turere 12 tugize u Rwanda ndetse ibi bitaramo by’’Ineza Tour’ bikaba bizambukanwa imipaka bigezwe mu mahanga hamamazwa ineza y’Imana.

Joshua Gatera, Umpuhuzabikorwa wa ‘Ineza Tour’yabwiye Inyarwanda.com ko abantu bose bahawe ikaze muri iki gitaramo kigiye kubera mu karere ka Huye. Yavuze ko nyuma y’i Huye, ‘Ineza Tour’ izakomereza mu karere Musanze ko mu Ntara y’Amajyaruguru ndetse na Rubavu ko mu ntara y’Uburengerazuba.

Yagize ati “Huye ho harimo n’umwihariko kubera ko tugiye kuhakorera igitaramo dutekereza ko kizaba gikomeye cyane. Bitewe n’uko tuzakorera mu turere 12. Aka ni Akarere ka kane tugiye gukoreramo igitaramo. Kane, umunani, cumi na kabiri n’imibare ikomeye.”

Yungamo ati “Niyo mpamvu twashyizemo imbaraga nyinshi kugira ngo tuzagikore mu buryo bwiza cyane binyuze buri wese.Tuzaba turi kumwe n’abahanzi icumi. Icyo twabwira abantu b’i Huye ni ukuzaza ari benshi ariko n’ab’i Muhanga, Nyanza, Ruhango…i Kigali ushobora kuzana nawe ukahagirira ibihe byiza cyane.”

'Ineza Tour' igiye kubera i Huye

Diana Kamugisha ugiye kuririmba muri iki gitaramo ‘Ineza Tour’ afite indirimbo zifasha benshi nka: ‘Mwami Mana’, ‘Haguruka’, ‘Ibendera’, ‘Hari byinshi bituzuye’n’izindi nyinshi. Uwineza Clarisse uzwi nka The pink mu ruhando rwa muzika afite indirimbo nka ‘Ikiganza cy’Uwiteka’ yahuriyemo na Gaby Kamanzi, ‘You love me’ yakoranye na NPS bafatanyije na Columbus, ‘Hold on’ yakoranye na Eddie Mico n’izindi nyinshi ziha ikuzo Imana.

Janvier Muhoza nawe uzifatanya n’ab’i Huye kuramya Imana afite indirimbo nka: ‘Izabikora’, ‘Ibyiringiro’, ‘Nzamuhangamaso’ yakoranye na Mudakikwa Alexis n’izindi. Olivier The Legend we afite indirimbo nka : ‘Wowe gusa’, ‘Ibishya’ yakoranye na Pastor Gasha, ‘Ingofero’, ‘Icyo yavuze’ n’izindi zihembura imitima ya benshi.

Elyse wa Gisubizo Ministries yatumiwe muri iki gitaramo

Umunyamuziki Babou

Umuraperi MD

Olivier The Legend

Diana Kamugisha