Bruce Melody mu bo yashimiye nyuma yo gutwara PGGSS8 harimo n'umuyobozi wa Super Level bareganye mu nkiko

Uru rubanza rwamamaye cyane mu itangazamakuru rwari rwambikanye hagati ya Super Level yari ihagarariwe na Richard Nsengumuremyi ari nawe wari umuyobozi wayo ndetse na Bruce Melody aho batumvikanaga ku mubare w'amafaranga y'u Rwanda uyu muhanzi yagombaga kwishyura inzu ya Super Level kuko hari amasezerano bamushinjaga kwica nyuma yo kuva muri iyi nzu yafashaga abahanzi.

Bruce Melody umwe mu bo yashimiye harimo Richard Nsengumuremyi umuyobozi wa Super Level

Aba baburanye igihe kinini nta munsi n'umwe byigeze bivugwa byibuza ko baba bariyunze. Icyakora bitunguranye uyu muhanzi yashyize Richard Nsengumuremyi ku rutonde rw'abantu ashimira bagize uruhare mu iterambere rye kugeza ubwo atwaye igikombe cya Primus Guma Guma Super Star ya munani. Ubu butumwa bw'ishimwe, Bruce Melody yabunyujije kuri Instagram.

Richard Nsengumuremyi wari ukuriye Super Level

Inyarwanda.com yagize amatsiko yo kumenya niba uyu muhanzi yaba yariyunze na Richard Nsengumuremyi maze Bruce Melody atangariza Inyarwanda.com ko batigeze bahura kuko buri wese yabaga yihugiyeho ariko nanone yongeraho ko nubwo bagiranye utubazo bitavuze ko ntacyo yamufashije mu muziki ari nayo mpamvu yamushimiye kuko azirikana uruhare rwa Richard mu iterambere rye mu muziki.

Bruce Melody hamwe n'umunyamategeko wari umuhagarariye mu rubanza bari bahanganyemo na Super Level

Usibye ariko uyu mugabo Bruce Melody yashimiye yanashimiye kandi abandi bantu banyuranye barimo abanyamakuru, aba Djs, abagize Yuhu Music ikipe imufasha muri iyi minsi, abafana be, abahanzi bagenzi be ndetse n'aba producers bose bamufashije ariko yitsa kuri Fazzo Big Producer wamukoreye indirimbo ya mbere yamamaye.

Aha Bruce Melody yari amaze gucibwa miliyoni 3 gusa mu gihe Super Level yo yifuzaga miliyoni 18

Tubibutse ko Bruce Melody ari we muhanzi uherutse kwegukana igikombe cya Primus Guma Guma Super Star yabaga ku nshuro ya munani bityo aba umunyabigwi wa munani wegukanye iki gikombe nyuma ya Tom Close, King James, Riderman, Jay Polly, Knowless, Urban Boys na Dream Boys.