Alpha Rwirangira agiye gukora ibitaramo bizazenguruka Leta zinyuranye zo muri Amerika

Kuri gahunda y’ibi bitaramo bine yise 'Merci Concerts', Alpha Rwirangira azatangira tariki 10 Ugushyingo 2017 akazahera muri Leta ya Minnesota  aho kwinjira mu gitaramo cye bikazaba ari amadorari cumi n'atanu (15$).Nyuma y’iyi Leta, Alpha Rwirangira azakurikizaho Leta ya Georgia mu mujyi mukuru w’iyi Leta wa Atlanta kwinjira muri iki gitaramo kizaba tariki 17 Ugushyingo 2017 akazaba ari amadorari makumyabiri (20$).

Nyuma ya Atlanta, Alpha Rwirangira azakurikizaho umujyi wa Houston ho muri Leta ya Texas, aha akazahataramira  tariki 23 Ugushyingo 2017, nyuma y'aha akazakurikizaho Leta ya Arizona aho azataramira tariki 2 Ukuboza 2017. Uyu muhanzi yatangarije Inyarwanda.com ko nyuma y’ibi bitaramo agitekereza uko yazakorera n’ikindi gitaramo muri Dallas.

Alpha Rwirangira agiye gukorera ibitaramo muri USA

Abajijwe niba ateganya kuza gutaramira mu Rwanda, Alpha Rwirangira yabwiye umunyamakuru ko ibi nabyo abiteganya ariko yagombaga kubanza gutunganya ibi bitaramo azakorera muri Leta Zunze Ubumwe za Amerika, ibi bitaramo ngo bizakurikirana no kuba muri iyi minsi hari indirimbo nshya ashaka gushyira hanze mu rwego rwo gukomeza gushimisha abakunzi ba muzika ye.

REBA HANO INDIRIMBO 'MERCI' ALPHA RWIRANGIRA YANITIRIYE IBI BITARAMO