Umuhanzikazi mu ndirimbo zo kuramya no guhimbaza Imana, Aline Gahongayire yatumiye abaramyi batandatu mu gitaramo cya kabiri cy'Ineza Tour agiye gukorera mu mujyi wa Nyamata mu karere ka Bugesera mu Ntara y'Uburasirazuba.
Ni nyuma y'uko afunguye uru rugendo rw'ibitaramo azakorera mu turere 12 mu gitaramo cyuzuye ubuhanuzi yakoreye i Kabuga mu mujyi wa Kigali, tariki ya 27 Gicurasi 2018. Abaramyi Diane Kamugisha, Olivier Kavutse, Stella Manishimwe, Eddie Mico, MD ndetse na Karyango Bright ni bo yatumiye mu gitaramo agiye gukorera i Nyamata.
Aline Gahongayire kuwa 24 Kamena 2018 ni bwo azaba akora igitaramo cy'ineza ahakusanyirizwa inkunga yo gufasha imiryango itishoboye n'abanyeshuri bafashwa n'umuryango Ineza family watangijwe na Aline Gahongayire. Iki gitaramo kizabera kuri Zion Temple i Nyamata, ni muri metero nke ujya kuri gare nkuru y'umujyi wa Nyamata.
Uretse Aline Gahongayire n'aba bahanzi batandatu yatumiye, iki gitaramo kandi kizanaririmbwamo na Asaph Zion Nyamata y'uru rusengero. Biteganyijwe ko kizatangira saa cyenda z'amanywa kugeza saa kumi n'ebyiri n'igice z'umugoroba.
Diane Kamugisha wamutumiwe muri iki gitaramo cy'Ineza Tour afite indirimbo zihembura benshi nka 'Haguruka' yasohotse muri 2015, 'Mpanagurwe' yahuriyemo na The Pink yasohotse muri 2016 ndetse na 'Kumusozi' yasohotse muri 2017 n'izindi nyinshi zogeza ubutumwa bw'Imana.
Stella Manishimwe uzaririmba muri iki gitaramo nawe afite ibihangano byinshi bibumbatiye ubutumwa bw'Imana nka 'Ni njye wa mugore', 'Ibihe biruhije', 'Yesu Kristo niyamamare' n'izindi nyinshi zamamaza ubutumwa bwiza.
Umuraperi Bright Karyango nawe watumiye afite indirimbo nka 'Rubasha', 'Uratabawe' yakoranye na Gaby Irene Kamanzi, 'Mu buzima' n'izindi nyinshi. Eddie Mico na MD bafite indirimbo bahuriyemo bise 'Afurika Haguruka' bakoranye na M.Olivier yasohotse muri 2017.
Igitaramo Aline Gahongayire agiye gukorera i Nyamata
Eng
RSS 
TANGA IGITECYEREZO