Aimable Twahirwa yatunguriwe mu mugoroba w’isanamitima yifurizwa isabukuru y’amavuko-AMAFOTO+VIDEO

Ni mu mugoroba w’isanamitima wamaze hafi amasa abiri. Ubwo uyu muhango wari usoje, umuhuza w’amagambo (MC) yasabye abagize Shekinah Drama Team kwigira imbere kuri stage. Aimable Twahirwa wari kumwe n’Umunyamakuru wa Inyarwanda.com baganira nawe yahamagawe ku rubyiniro.

Aimable Twahirwa yazamutse kuri stage aseka n’uko abwira Umunyamakuru ati: ‘Hakenewe agafoto k’urwibutso ndi kumwe n’aba basore n’inkumi ba Shekinah Drama Team’. Amafoto yafashwe Aimable Twahirwa akomeza kwisekera ndetse n’abo basore n’inkumi bamushimira uburyo yabafashije kwesa umuhigo w’umukino wiswe ‘Quest to the Cure’.

Aimable yagiye ku rubyiniro aziko agiye gufata ifoto y'urwibutso

Mu gihe Aimable yarimo yitegura kuva kuri stage yakirijwe indirimbo n’urufaya rw’amashyi n’amajwi yamwifurizaga isabukuru nziza y’amavuko, yabuze uko yifata atangira kubyina indirimbo bari bateye y’isabukuru y’amavuko ariko nako amarira y’ibyishimo azenga mu maso. Mu kiganiro  yahaye Inyarwanda.com yatangaje ko yishimira kuba mu muryango wa Shekinah Drama Team avuga ko ibijyanye n’isabukuru y’amavuko atabyibukaga kuko yari ahugijwe no gutegura uburyo igikorwa cy’isanamitima cyazagenda neza mu ngengabihe yose bihaye.

Aimable Twahirwa yagize ati:"Ntabwo nari nzi ko bari bunkorere ibi ndatunguwe!Ngize imyaka mirongo ine n’itanu (45). Mfite umugore n’abana batatu (Umuhungu n’abakobwa babiri).” Aimable yavuze ko ibyo akora ubu adashaka kugira umwana we abihatira ahubwo ko byose bizaterwa n’amahitamo y’abana be.

Umutsima wari wamuteguriwe

Abagize Shekinah Drama Team bamubyinishije ku buryo Aimable yanyuzagamo agakuramo amatarata akihanagura mu gahanga. Yabashimiye bose uburyo batekereje icyo gikorwa. Tugenekereje amagambo yavuze mu rurimi rw'igifaransa ubwo yabashimiraga, yagize ati:"Ndabakunda mwese".

Aimable Twahirwa yakase umutima wari wamuteguriwe wanditseho ‘Isabukuru y’amavuko nziza Aimable Twahirwa’. Abagize Shekinah Drama Team kandi bamuhaye impano y’ifoto igaragara mu ibara ry’umweru n’umakara Aimable yambaye ingofero.

Yakase umutsima agaburira abagize Shekinah Drama Team

 Aimable yacinye akadiho....

Aimable Twahirwa yize mu ishuri ry’ubuhanzi ‘Ecole Internationale de Theatre et de Mouvements Jacques Lecoq” ry’i Paris mu Bufaransa, ari naho yatangiye kugaragariza impano y’ubuhanzi yakomeje kwagura kugeza n’ubu. Uyu mugabo kandi anafite impamyabumeyi y’icyiciro cya kabiri cya Kaminuza mu Itangazamakuru n’Itumanaho. Uretse kuba kuri ubu ari gutoza abagize Shekinah Drama Team, Aimable Twahirwa yateguye ibitaramo byinshi byibanda ku muco anatoza abaririmbyi, ababyinnyi n’abakina amakinamico mu Itorero rya Kaminuza ya Butare ryitwa Indangamuco.

REBA AMAFOTO Y'UKO BYARI BIMEZE:

Ifoto y'urwibutso.....

Yahawe impano y'ifoto ishushanyije

Bamushimiye....

REBA HANO MU MASHUSHO UBWO AIMABLE TWAHIRWA YATUNGURWAGA

AMAFOTO&VIDEO: Janvier Iyamuremye (Inyarwanda.com)