Urutonde rw’ibyamamare nyarwanda bizitabira ibirori bya Red Avenue cyateguwe na Teta Sandra bizabera kuri Lemigo Hotel kuri uyu wa gatandatu rukomeje kwiyongera. Uretse abahanzi Bruce Melody ndetse n’itsinda rya Active bazaririmba, ibi birori buri wese azaba yambaye umutuku, bizitabirwa n’ibyamamare binyuranye.
Red Avenue ni ibirori byateguwe na Teta Sandra mu rwego rwo gutangiza ku mugaragaro kompanyi ye bwite ’Luminous Events’ no kugaragaza ibyo ikora. Sandra Teta yateguye ibirori bizahurirwamo n’abahanzi ndetse n’ibyamamare bya hano mu Rwanda mu bice byose, ibirori buri muntu wese uzabyitabira azaba yambaye imyenda itukura ari naho havuye izina rya ‘Red Avenue’.
Derek wo muri Active azaza gufasha umukunzi we gushyira umusingi kuri kompanyi ye nshya yashinze
Red Avenue izaba ku munsi w’ejo ku wa gatandatu tariki 30 Werurwe 2015. Izatangira ku isaha ya saa moya z’umugoroba. Uretse abahanzi biteganyijwe ko bazaririmba, hazaba harimo n’ibindi byamamare muri muzika, umupira w’amaguru, abanyamideli, ba Nyampinga, abakina filime n’abandi banyuranye. Ubwo ibirori bizaba bitangiye, abahanzi b’ibyamamare bazatambuka kuri tapi itukura, amashusho yerekanwa kuri ecran nini. Umunyarwenya akaba n’umunyamakuru Nkusi Arthur ndetse na Tidjala Kabendera nibo bazaba bayoboye ibirori bya’ Red Avenue’. Anita usanzwe amenyerewe mu kuyobora ibitaramo azaba ari DJ afatanyije na DJ Mupenzi.
Bamwe mu bahanzi ba muzika bategerejwe muri Red Avenue: Riderman, Danny Nanone, Ciney, Queen Cha, Allioni, Sacha, Christopher.
Aberekana imideli harimo: Carol, Sissy, Jeanine, George.
Ba nyampinga bazitabira Red Avenue: Akiwacu Colombe, Miss Rwanda 2014, Vanessa Uwase Raissa wabaye Igisonga cya mbere cya nyampinga w’u Rwanda 2015, Joanah , nyampinga w’umuco muri 2015.
Abakinnyi b’umupira w’amaguru nka Sekamana Maximme na Mubumbyi Bernabe bose bakinira ikipe ya APR FC nabo bakaba bazagaragara muri Lemigo Hotel kwifatanya na Teta n’abazaba bitabiriye Red Avenue. Mu bakinnyi ba Filime bazaba bahari harimo Liane ndetse na Dennis Nsanzamahoro bakunda kwita Rwasa. Si aba gusa kuko n’abahanzi bose bazaba bavuye mu gitaramo cya PGGSS 5 kizabera I Karongi bazahitira muri iki gitaramo bagasabana n’abafana babo, bakiyongera no kubandi bataravugwa kugeza ubu kuko urutonde rugikorwa.
Kwinjira muri Red Avunue’ bizaba ari amafaranga ibihumbi icumi (10.000 Frw) ku bagabo n’ibihumbi umunani ku bagore n’abakobwa(8.000 Frw). Uzaza aherekejwe (couple)azishyura amafaranga ibihumbi cumi na bitanu(15.000 Frw).
Eng
RSS 
TANGA IGITECYEREZO