Abanyarwandakazi 2 bari mu bashaka kwitabira irushanwa ry'uburanga rya Miss Africa 2018

Ni ku nshuro ya gatatu hagiye kuba irushanwa ry’ubwiza rya Miss Africa Calabar ritegurwa na Leta yitwa Cross River yo muri Nigeria. Umuhango wo kwambika ikamba umukobwa uzahiga abandi, uzaba tariki 27 Ukuboza 2018 muri Calabar International Convention Center. Ni ku nshuro ya kabiri u Rwanda rugiye kwitabira Miss Africa Calabar, nyuma y’aho umwaka ushize Muthoni Fiona Naringwa yaryitabiriye akegukana umwanya w’igisonga cya mbere aho yahembwe amadorali ibihumbi 10.

Mutoni Jane wabaye igisonga cya mbere muri Miss Heritage Global 2016-2017 ari mu bahatanira kwitabira iri rushanwa

Mu mubare munini w'abakobwa biyandikishije banamaze kohereza amashusho yabo, harimo n’abanyarwandakazi babiri ari bo Mutoni Jane wabaye Miss Heritage 2016 mu irushanwa rya Nyampinga w’u Rwanda, akanaba Igisonga cya mbere cya Miss Heritage Global 2016/2017, n’undi witwa Umwiza Gisele we utamenyerewe mu marushanwa y’uburanga icyakora nk'uko bigaragara mu mafoto akaba asigaye ari umukobwa umurika imideri.

Umwiza Gisele nawe ari mu bahatanira kwitabira iri rushanwa

Iri rushanwa rizasozwa tariki 27 Ukuboza 2018 risiga umukobwa wegukana ikamba ahawe imodoka yo bwoko SVU ifite agaciro k'ibihumbi 50 by'Amadorali y'amerika, amafaranga ibihumbi 35 by'amadorali n'ibindi. Igisonga cya mbere azahabwa ibihumbi 10 by'amadorali naho igisonga cya kabiri we ahabwe ibihumbi 5 by'amadorali y'Amerika.