Bahati arashinjwa ubuhemu no kwiyambika umwambaro wa Just Family agamije amaronko

Ni nyuma y’uko muri iki Cyumweru habaye umukwabo wafatiwemo aba Djs basanzwe ari abanyamuryango ba United street promotion batubura bakanakwirakwiza imiziki bari bafite mu machine zabo bimwe mu bihangano bya Just family.

Uyu mukwabo wari uhagarariwe na koperative y’indi yitwa Atmosphere ari nayo yemeza ko ifite uburenganzira yonyine mu gukwirakwiza no gutubura ibihangano bya Just family, ibi bikanemezwa na Bahati. Abasore bagera kuri 11 basanzwe ari abanyamuryango ba United street promotion bafatiwe muri uwo mukwabo wabaye mu bice bitandukanye by’umujyi wa Kigali kuri uyu wa Gatatu maze bafungirwa kuri station ya Police Nyarugenge gusa nyuma ya masaha macye baza kurekurwa gusa machine zabo ntibahita bazisubizwa.

Aha, Bahati na Dj K wo muri United street promotion ntibavugaga rumwe

Ubwo umunyamakuru wa inyarwanda.com yageraga kuri iyi station, twahasanze uruhande rwa United street promotion rwari rwaje kuvuganira abanyamuryango barwo, uruhande rwa Atmosphere rwari ruri muri iki kibazo ndetse n’umuhanzi Bahati wagaragaraga nkuwateranyije izo mpande zombi, aho buri ruhande rwagaragazaga amasezerano bafitanye na Just family ariko aya Atmosphere akaba yasinywe na Bahati ku giti cye mu izina rya Just family.

Nk’uko abahagarariye United street promotion babidutangarije, mu minsi ishize nibwo babonye urupapuro rwanditswe na Bahati rubamenyesha ko nta burenganzira bagifite bwo gukomeza gucuruza ibihangano bya Just family hamwe n’ibya Bahati ku giti cye.

Mu gihe komoti nyobozi ya United street promotion yiteguraga guhura ngo yige kuri urwo rwandiko rwanditswe na Bahati nibwo ku rundi ruhande Bahati we wari waciye inyuma akagirana andi masezerano na Atmosphere bahise batangira gufata abaDjs ba United street promotion.

Ndacyayishimiye Jean Bosco(Dj Bob)

Ndacyayishimiye Jean Bosco uzwi cyane ku izina rya Dj Bob akaba ariwe Perezida wa Koperative United street Promotion aganira n’inyarwanda.com yagize ati “ Twe nka United street promotion, twatunguwe no kubona urupapuro rwa Bahati rudusaba gusesa amasezerano twagiranye na Just family. Ibi twari twapanze kubyigaho mu minsi ya vuba tukamuha igisubizo ariko igitangaje ni uko ngo yahise asinyana amasezerano nabitwa Atmosphere batangira kudufungira abanyamuryango.”

Dj Bob avuga ko itsinda rya Just family ubwaryo ariryo ryaje rigana United street promotion mu gihe ryari rigizwe na Croidja, Jimmy na Bahati, maze babasaba kuba bakorana bakabafasha kumenyekanisha no gukwirakwiza ibihangano byabo. Aya masezerano yarasinywe ndetse koperative ya United street promotion nayo igenda ifasha mu bikorwa bimwe na bimwe iri tsinda harimo kubafasha gukora amashusho y’indirimbo zabo n’ibindi ariko bagwa mu rujijo rw'urupapuro rwanditswe na Bahati mu izina rya Just family abasaba kutazongera gucuruza ibihangano bya Just family.

Amasezerano agaragaza ko ibihangano bya Just family bifitweho uruhare na United street promotion

Dj Bob avuga ko igitangaje ari uko indirimbo nka bindimo na Bakubwire zakozwe ku bufatanye na United street promotion ari nayo izifitiye uburenganzira(Copyright) ari zimwe mu zafungishije abanyamuryango ba United street promotion muri uyu mukwabo uherutse kuba.

Ku rundi ruhande, Bahati uherutse gutangaza ko yakijijwe kuri ubu akaba asigaye aririmba indirimbo za gospel, we avuga ko afite uburenganzira ijana ku ijana bwo guhagarira Just family hano mu Rwanda ndetse ko ibyo yakoze byari bikwiye. Ati “ Uyu munsi Just family ntabwo bari mu Rwanda, ni njyewe shefu wa Just family, managing director, muri RDB ibyangombwa byose uzasanga ari njyewe chef, niyo contract ya United ni njyewe wayisinye, ikindi niba Just family yose itari mu gihugu, umuntu wese ukeneye gukoresha Just family mu bintu byakozwe azashaka njyewe uri mu gihugu, amahirwe  ni uko ari njye wasigaye mu gihugu kandi nkaba nari shef wa groupe, byari kugorona cyane iyo nza gusinya atarinjye wari usanzwe usinya.”

Bindimo nayo n'imwe mu ndirimbo Just family yakoze ku bufatanye na United street promotion

Tumubajije niba asanga ataba yarihuse guhagarikisha amasezerano Just family yari isanganywe na United street promotion akayegurira Atmosphere, Bahati yagize ati “ Oya, njyewe icyo ngomba kuganiraho nabo, ni ukuvuga ngo haje abantu barishyura amafaranga aya naya,hanyuma nk’uko bisanzwe tukavugana uburyo amafaranga abageraho. Hari amabanga ya Just family, hari amabanga ya United n’amabanga ya Atmosphere, ntabwo bashinzwe kumenya ibya Just family.Sibyo?Niyo ntanababwira, ushobora gusanga n’amafaranga ntarayabona ariko mvuga nti ninyabona, nzayaboherereza kuko icyo bakeneye ni amafaranga!”

Bahati yisubiye United street promotion mu gihe mu kwezi kwa 9 aribwo bari bagiranye amasezerano ku giti cye nk'umuhanzi

N’ubwo avuga ko nta kosa yakoze, mugenzi we Croidja bahoranye mu itsinda rya Just family yamwamaganiye kure, avuga ko ayo ari amacabiranya Bahati yakoze kuko we ubwe yavuze ko yasezeye mu itsinda rya Just family bityo akaba atari akwiye kuba agifatira ibyemezo iri tsinda akanabikora atabiganirije bagenzi be.

Croidja ati “ Bahati nareke gutesha abantu imitwe azana ubuswa. We ko yivugiye ko yavuye muri Just family akanava mu by’isi, icyo ashaka kandi n’igiki? Ntiyigeze abimbaza na gato kandi Bahati ntakibarizwa muri Just family nta burenganzira afite bwo gufata ibintu bya bantu akabigira uko yishakiye, umuntu wese urimo urenganywa na Bahati kubera Just family anshake njyewe.”

Ku ruhande rwa United street promotion yanaherukaga gutera inkunga igitaramo Bahati aherutse gukora cyo kumurika album ye ya mbere avuga ko ari iy’ivugabutumwa ry’Imana, bavuga ko bababajwe bikomeye n’ibyo uyu mugabo yakoze ndetse bakaba babifata nk’ubuhemu.

Nizeyimana Selemani