Abahanzi nyarwanda bazasusurutsa ibirori bya Rwanda day i Atlanta bamaze gufata indege-AMAFOTO

Aba bahanzi bakaba bose bahagurukiye rimwe i Kigali mu Rwanda ahagana ku saa mbili z’umugoroba zo kuri uyu wa Gatatu tariki ya 17/9/2014.

King James ku kibuga cy'indege i Kanombe. Ngo yiteguye kuzashimisha abanyarwanda

Aba bahanzi bose bavuga ko ikibajyanye ari ukwifatanya n’abanyarwanda muri uyu muhango, bakabasusurutsa bakabakumbuza umuco n’igihugu cyabo ariko kandi banabagaragariza aho bageze biyubaka.

Sentore ati “ Niteguye kunezeza abanyarwanda bazaba baturutse ahantu hatandukanye kandi mbaha umwimerere nk’uko nabitojwe kandi ndizera nzakora neza bikabanyura.”

Massamba ati “ Twe nka Gakondo tujyanywe no kubakumbuza urw’ababyaye tubinyujije mu nganzo zacu za Gakondo.”

Teta nawe ngo yizeyeko azasusurutsa neza abazaba birabiriye ibi birori

Si aba bahanzi gusa kandi bazasusurutsa ibi birori kuko bazaba bari kumwe na bagenzi babo basanzwe baherereye muri Leta Zunze Ubumwe za Amerika harimo umuraperi K8 Kavuyo, Meddy na The Ben babarizwa muri Press one, wongeyeho Emmy na Alpha Rwirangira bose biteguye kuzifatanya n’umuryango nyarwanda uzaba witabiriye ibi birori ndetse bakanabasusurutsa.

K8 Kavuyo, Meddy na The Ben nabo biteguye gufatanya na bagenzi babo gususurutsa ibi birori

Usibye aba bahanzi kandi ntitwabura kubabwira ko umunyarwenya Ntarindwa Diogene uzwi cyane ku izina rya Atome ndetse n’umunyamideli Francis Iraguha ufite kompanyi y’imideli ya Francis Zahabu nabo ari bamwe mu baturutse mu Rwanda bagiye kugaragaza abavandimwe babo bazitabira uyu muhango, aho bageze batanga umusanzu wabo mu iterambere ry’umuco n’igihugu cyabo muri rusange.

Umunyamideli Francis Iraguha nawe yashyiriye imyambaro ikorerwa mu Rwanda, abazitabira uyu muhango

Rwanda Day y’uyu mwaka, yateguwe ku bufatanye na Ambasade y’u Rwanda muri Leta Zunze Ubumwe za Amerika, Ihuriro ry’abanyarwanda baba muri Amerika y’amajyaruguru ndetse n’inshuti z’u Rwanda ziri muri Leta Zunze Ubumwe za Amerika, muri ibi birori ku nshuro ya mbere Perezida wa Repubulika Paul Kagame akaba azasangira umuganura n’abazitabira ibirori bose.

Umuhango nyirizina utegerejwe tariki 20 Nzeli I Atlanta ho muri Leta ya Georgia, aho abanyarwanda n’inshuti z’u Rwanda bayobowe na Perezida Paul Kagame bazaba baganira ku ngingo zitandukanye bagendeye ku nsanganyamatsiko “Agaciro : Our Choice” (Agaciro : Twahisemo), bibanda ku ntambwe yatewe nyuma y’imyaka 20 ishize u Rwanda rwibohoye icuraburindi. Naho mu bandi bashyitsi bakomeye bateganyijwe kugaragara muri uyu muhango hakaba harimo impirimbanyi z’Uburenganzira bwa muntu nka Ambasaderi Andrew Young, Dr Bernice A.King , abacuruzi bakomeye b’Abanyamerika n’Abo mu Rwanda.

Nizeyimana Selemani